Etholiad Cyffredinol 2024 – y canlyniadau

Canlyniad Torfaen – Llafur a Nick Thomas-Symonds yn cadw’r sedd, ond gogwydd 4.5% yn y bleidlais o Llafur i Reform. 

Buddugoliaeth ysgubol i Ed Davey, arweinydd y Lib Dems yn Kingston a Surbiton – dyblu ei fwyafrif

Fideo o ganlyniad Wrecsam gan Sara Wheeler

Rhys Owen (Gohebydd Gwleidyddol)

Mae Wrecsam wedi pleidleisio i ethol Andrew Ranger o’r blaid Lafur. O edrych ar y pleidleisiau mae Sarah Atherton sydd wedi dod yn 2ail efo 6,000 yn llai na gafwyd yn 2019 – yr union faint mae Reform wedi ennill yn y sedd y tro hwn yn 3ydd. 

Cyd-ddigwyddiad?

Jason Morgan

Mae canlyniadau noson etholiad yng Nghymru fel bysus, tydyn – mae’n anodd iawn dal i fyny!

Mae’r patrwm o’r chwe sedd sydd wedi’u cyhoeddi yng Nghymru hyd yma’n ddifyr tu hwnt, ac yn ymylu ar ryfeddol.

Dydi Llafur ddim yn torri tir newydd o gwbl ac yn wir mae hi’n mynd am yn ôl – mewn blwyddyn y mae hi’n ei chwalu hi ar lefel Brydeinig. Dwi bellach yn meddwl bod y posibiliad a soniais amdano’n gynharach o Lafur yn gwneud yn well yn Lloegr na Chymru’n fwy tebygol.

Gostyngodd ei phleidlais gan 10% yng Ngorllewin Abertawe a dros 5% ym Mhontypridd.

Mae’r Ceidwadwyr yn gwneud yn sobor o wael a dwi’m yn meddwl bod amheuaeth bellach y byddan nhw’n drydydd o ran nifer y pleidleisiau, tu ôl i Reform UK. Fel ym 1997 a 2001, bosib bod achubiaeth Gymreig y blaid yng Nghymru yn gorwedd ym Mae Caerdydd.

Mae Reform UK eu hunain yn gwneud yn arbennig o dda, hwyrach fymryn yn well nag oedden ni’n ei ddisgwyl, er nad ydyn nhw’n debygol o ennill sedd. Ond mae perfformiad Plaid Cymru hyd yma’n nodedig hefyd, mae hi wedi cynyddu ei phleidlais ymhob sedd, a hynny mewn seddi sydd ddim yn agos at fod yn seddi targed iddi, nac yn rhai lle mae ganddi fawr o bresenoldeb ynddynt.

Mae’n rhyfeddol fel y mae pobol yn pleidleisio’n debyg mewn gwahanol etholaethau, hollol wahanol bell oddi wrth ei gilydd. Y Ceidwadwyr sy’n colli yng Nghymru, nid Llafur yn ennill. Mae lefel y pleidleisio a chynnydd y pleidiau llai yn dangos y diffyg ffydd mewn gwleidyddiaeth.

Yn Lloegr, mae’n ymddangos bod y symudiad at Lafur yn gryfach – arwydd o broblemau Llywodraeth Cymru a Vaughan Gething?

Penrhyn Gwyr a Thorfaen yn dilyn y patrwm – mae am fod yn noson undonog yng Nghymru. Y diddordeb ydi maint cwymp y Ceidwadwyr a faint y mae Reform yn ei gael – roedden nhw’n ail yn Nhorfaen.

Llafur yn cipio Kilmarnock oddi ar yr SNP – yn weddol gyffyrddus

George Galloway wedi colli Rochdale i Lafur. Neil Kinnock yn ei ddisgrifio fel ‘repellent, repulsive character’. Hyd yn oed Neil Kinnock yn gallu siarad yn gall weithiau! 

Canlyniad o Wrecsam! 

Llafur yn cipio – Andrew Ranger yn bachu’r sedd gan Sarah Atherton o’r Ceidwadwyr. 

Y Ceidwadwyr yn colli 22% o’r bleidlais, gyda Llafur yn dal eu tir (+1%). 11.5% o ogwydd. Reform yn drydydd – Plaid Cymru (+4%) a’r Dems Rhydd (+4%) yn cynyddu eu cyfran o’r bleidlais. 

Y patrwm yn parhau ym Mhontypridd a Wrecsam – chwalfa’r Ceidwadwyr yn dangos bod pobol am eu cosbi nhw ond methiant Llafur i godi (neu hyd yn oed gwympo) yn dangos diffyg brwdfrydedd atyn nhw. Y pleidiau llai i gyd yn ennill rhyw ychydig bron bob tro. Mi fydd y diffyg awydd yn bryder a phroblem i Lafur, waeth faint fydd eu mwyafrif.