Etholiad Cyffredinol 2024 – y canlyniadau

Hywel Williams o Blaid Cymru ar S4C yn dweud ei bod yn edrych yn ‘addawol’ i’r Blaid yng Nghaeryrddin ac Ynys Môn. 

Ymgeisydd y Democratiaid Rhyddfrydol Leena Farhart wedi bod yn siarad yn y cyfri yn Ynys Môn: 

“Dwi mor falch o bobl sydd wedi bod yn ymgyrchu dros y Democratiaid Rhyddfrydol – dydi o ddim yn fater o ariannu efo ni, mae o oherwydd bod pobl wir yn poeni am y sefyllfa rydym mewn.

Ar y mater o symud ymlaen o oes y glymblaid fel mater ar y stepen ddrws, dywed ei bod hi’n “fater sy’n genhedlaethol” mewn natur.

Dywed bod sgandalau’r Ceidwadwyr wedi tynnu sylw oddi ar faterion mwy hanesyddol fel y glymblaid.

Ar y canlyniad yr etholiad yn genedlaethol, dywed ei bod hi ddim yn diystyru’r posibilrwydd o Sir Ed Davey fel arweinydd yr wrthblaid nes bod pob pleidlais wedi’u cyfri.

Cadarnhad o’r nifer sydd wedi bwrw pleidlais yn Wrecsam gan Sara Wheeler:

57.64% turnout yn Wrecsam – 40,501 o bapurau pleidlais o gyfanswm 70,269 allai fod yn pleidleisio

Gan Hana Taylor yng Nghaerffili:

52.84% turn out yng Nghaerffili!

Dylan Wyn Williams:

Cyn brif weinidog y Senedd yn sedd chwilboeth S4C. Carwyn Jones yn cael ei holi’n dwll gan Bethan Rhys Roberts ar ddiffyg ymrwymiad Starmer i ariannu teg i Gymru, celc HS2, datganoli mwy o rymoedd cyfraith a threfn. Yr Athro Richard Wyn Jones yn ei atgoffa am beth ddwedodd Jo Stevens, Aelod Seneddol Canol Caerdydd, nad oes angen “ffidlan” efo pwerau plismona.

Arwydd o’r cwestiynau caled i ddod am y berthynas rhwng Llafur Llundain a Llafur Caerdydd.

Aled Thomas, ymgeisydd y Ceidwadwyr yng Ngheredigion Preseli yn siarad ar S4C gan gydnabod ei bod hi’n noson anodd i’r Ceidwadwyr ac yn awgrymu bod angen i’r blaid yng Nghymru gael mwy o ‘bellter’ rhyngddyn nhw a’r blaid yn San Steffan.

Dr Edward Jones:

Ni all y llywodraeth newydd ganolbwyntio ar dwf economaidd yn unig, oherwydd mae’r buddion yn tueddu i beidio â llifo’n effeithiol i rannau helaeth o gymdeithas. O ran trawsnewid cymdeithas nid oes unrhyw atebion sy’n osgoi treth a gwariant.

Beirniadaeth hallt gan Robert Buckland o’i gyd-aelodau Torïaidd sydd wedi canolbwyntio ar wthio eu plaid i’r dde yn lle ymgyrchu yn yr etholiad. Tybed faint o Doriaid mwy cymedrol fel y fo fydd wedi colli heno. Mi allan nhw’n hawdd fod heb lais yn y blaid seneddol yn y Senedd newydd

Sara Wheeler wedi bod yn sgwrsio gyda Tim Green, ymgeisydd y Gwyrddion yn Wrecsam:

Mae heno wedi bod yn ddiddorol iawn, gweld y broses ayyb. Dyma fy nhro gyntaf yn sefyll, dw i wastad wedi pleidleisio o’r blaen, ond dyma fy nhro gyntaf fel ymgeisydd.

Tydan ni ddim yn disgwyl wneud yn dda iawn heno yma – mae’n rhwystredig achos mae pobl yn dweud eu bod nhw yn deall y materion ac yn cytuno gyda’r polisiau OND…ac mae yna wastad OND – tydach chi ddim yn mynd i ennill nac ydych? A’r prif consyrn gan rhan fwyaf o bobl yw i gael y toriaid allan, dyna mae pobl yn poeni amdanno, ac felly mae yna pleidleisio tacdegol.

A chi’n gwybod mae hi mor bwysig i ni ddechrau gwneud rhywbeth rwan – tydi hi ddim o bwys bai pwy ydi o, y cenhedlaeth nesaf sydd yn mynd i ddioddef, gan fod yn llai iach – dw i yn gweithio yn maes iechyd, felly dw i yn gweld iechyd y cyhoedd yn dirywio.

A be dw i eisiau gwybod yw sut fedre ni sicrhau fod fwy o’ pobl sydd yn credu yn ein polisiau ac yn deall y materion yn pleidleisio hefo ni. Sut fedre ni gael i mewn i’r Senedd a dechrau gwneud gwahaniaeth.

Tra ein bod yn aros am fwy o ganlyniadau mae’n werth nodi y gallai heno fod yn noson ddiddorol yng Ngogledd Iwerddon. 

Nol yn 2019 enillodd Sinn Féin saith sedd yn San Steffan, un yn llai na’r DUP, y brif blaid unoliaethol.

Fodd bynnag, mae’r DUP ar chwâl ar hyn o bryd yn dilyn ymadawiad disymwth Jeffery Donaldson o’r arweinyddiaeth ac fe allai golli tir eleni, er enghraifft yn sedd Dwyrain Belfast ble mae Gavin Robertson yn cael ei herio gan Naomi Long arweinydd plaid yr Alliance.

O ganlyniad, hyd yn oed os mai dim ond adennill yr un saith wnaiff Sinn Féin heno, gallai orffen fel plaid fwyaf Gogledd Iwerddon yn San Steffan.

Byddai hyn yn nodi ‘hatric’ o fuddugoliaethau etholiadol i Sinn Féin – hi fyddai’r blaid fwyaf yn Senedd San Steffan, yng Nghynulliad Gogledd Iwerddon a hefyd ar lefel llywodraeth leol yng Ngogledd Iwerddon.

Amser a ddengys …