Etholiad Cyffredinol 2024 – y canlyniadau

Yn ôl y BBC, mae David TC Davies, Ysgrifennydd Gwladol diweddaraf Cymru, wedi dweud ei fod e wedi colli ei sedd. Dim cadarnhad hyd yma. Ond pe bai’n wir, dyma ergyd fawr gynta’r noson i’r Ceidwadwyr.

Jason Morgan

Noswaith dda o Rachub, bawb! Ac mae hi’n etholiad anarferol iawn yma, achos dyma’r tro cyntaf erioed imi gael noson etholiad cyffredinol heb win yn oedolyn!

Ydyn ni’n gallu defnyddio’r pôl ola’ i ddadansoddi’r hyn allai ddigwydd yng Nghymru heno? Mae honno’n gêm beryg i’w chwarae, ond fe allwn ni ddyfalu ambell beth.

Dwi’n teimlo bod yna obaith i’r Ceidwadwyr ddal cwpl o seddi yng Nghymru os ydyn nhw ar tua 131 sedd fel sy’n cael ei broffwydo; eu gobeithion gorau fyddai cadw Sir Fynwy a Sir Drefaldwyn a Glyndŵr. Mae’n annhebygol iawn y gwnawn nhw gadw unrhyw seddi eraill.

Llafur fydd buddiolwyr hyn, ond gan ddweud hynny mae’r cyfanswm o 410 sedd – sydd dipyn llai nag a ragwelwyd gan y rhan fwyaf o bolau dros yr ymgyrch – o bosib yn newyddion da i obeithion Plaid Cymru ar Ynys Môn ac yng Nghaerfyrddin. Er hynny, mae’n bwysig nodi mai’r disgwyl yw y bydd brwydr agos yn y ddwy sedd.

Mae hefyd gyfle i’r Democratiaid Rhyddfrydol ddychwelyd AS ym Mrycheiniog a Chwm Twrch.

Un peth difyr imi fydd beth fydd y gagendor rhwng pleidlais y blaid Lafur yng Nghymru ac yn Lloegr. Dwi’n meddwl ei bod hi’n hollol bosib y bydd y bwlch hwnnw’n llai nag y mae wedi bod ers cyn cof.

A chofiwch, y cliw mawr dros yr oriau nesaf cyn i ganlyniadau ddod i law fydd gwylio wynebau gwleidyddion wrth iddyn nhw gael eu holi ar y teledu.

Serch hyn oll, mae’n debyg na chawn ni ganlyniad o Gymru am rai oriau. Cyfle i orffwys!

Hyn gan Rhys Owen am y pôl ymadael gafodd ei gyhoeddi toc ar ôl 10 o’r gloch:

“Er fod yr arolwg ddim yn derfynol, hwn yw’r syniad cyntaf rydym yn ei gael o’r canlyniad terfynol ar ôl i’r amser i bleidleisio ddod i ben.

“Mae’r arolwg yn cael ei gomisiynu gan Sky News, y BBC ac ITV News, ac yn cael ei arwain gan yr Athro Syr John Curtice o Brifysgol Strathclyde a chwmni IPSOS.

“Os ydi’r arolwg yn gywir, bydd y Ceidwadwyr yn dychwelyd eu nifer lleiaf o aelodau seneddol i San Steffan ers yr 1830au.

“I Lafur, er raddfa’r canlyniadau sy’n cael eu rhagfynegi, mae’r nifer yn is na’r 418 enillon nhw yn 1997.”

Eluned Morgan (Llafur) hapus iawn o gymharu ä Tomos Dafydd (Ceidwadwyr) mwy syber ar S4C, tra mae Richard Wyn Jones yn dipyn mwy gofalus efo’r “ysgubol” o gofio arolygon barn y gorffennol.

Mae Rachel Reeves, y Canghellor newydd tebygol, wedi addo y bydd Llafur yn “embrace securonomics”, ac mae wedi dweud, “No democratic government can be content with a lack of decent work, falling wages and the dimming of people’s hope for a better life”. Mae Reeves hefyd wedi galw am “fundamental course correction” pan ddaw hi’n fater o lunio polisi economaidd newydd.

Fe allai buddugoliaeth ysgubol i Lafur baratoi’r ffordd ar gyfer buddsoddiad ym Mhrydain ar ôl blynyddoedd o ansicrwydd gwleidyddol ac economaidd ers refferendwm Brexit 2016 o dan y Torïaid, a oedd wedi cymylu’r rhagolygon i fuddsoddwyr rhyngwladol. Mae economi’r Deyrnas Unedig wedi bod yn ei chael hi’n anodd ers 2019. Roedd Cynnyrch Mewnwladol Crynswyth (GDP) y Deyrnas Unedig yn Chwarter 1 2024 1.7% yn uwch na’i lefel cyn-pandemig yn Chwarter 4 2019. Mae hyn yn cymharu â 3.4% i’r UE ac 8.7% i’r US dros yr un cyfnod.

“Mae mwyafrif mawr i Lafur yn ymddangos yn fwy a fwy tebygol a gallai ddod â chyfnod o sefydlogrwydd i’r economi,” medd Dr Edward Jones, economegydd a darlithydd ym Mhrifysgol Bangor.

“Byddai hynny’n rhywbeth i’w groesawu i wlad sy’n cael ei harwain gan ei thrydydd prif weinidog ers yr etholiad cyffredinol diwethaf ac sy’n dal i gael trafferth gwella’r creithiau economaidd a adawyd gan Brexit.”

Mae’r pôl ymadael gan IPSOS yn awgrymu’r canlyniad canlynol:

Llafur 410 sedd

Ceidwadwyr 131 sedd

Democratiaid Rhyddfrydol 61 sedd

Reform 13 sedd

SNP 10 sedd

Plaid Cymru 4 sedd

Y Blaid Werdd 2 sedd

Eraill 19 sedd

Mae mwyafrif mawr i Lafur yn ymddangos yn fwy a fwy tebygol a gallai ddod â chyfnod o sefydlogrwydd i’r economi. Byddai hynny’n rhywbeth i’w groesawu i wlad sy’n cael ei harwain gan ei thrydydd prif weinidog ers yr etholiad cyffredinol diwethaf ac sy’n dal i gael trafferth gwella’r creithiau economaidd a adawyd gan Brexit. 

Edward Jones

Dyna ni! Mae’r cyfnod pleidleisio wedi dod i ben.