Etholiad Cyffredinol 2024 – y pleidleisio

Golwg yn ôl ar ddigwyddiadau diwrnod yr etholiad

Croeso i Blog Byw Etholiad Cyffredinol 2024 golwg360.

Byddwn ni’n dod â’r diweddaraf i chi cyn ac yn ystod yr etholiad dydd Iau (Gorffennaf 4), gan gynnwys canlyniadau, y diweddaraf o rai o’r canolfannau cyfrif, a’r holl ymateb o bob cwr o Gymru a thu hwnt.

Gydol nos Iau ac oriau mân fore Gwener, bydd criw o ohebwyr, golygyddion, colofnwyr a sylwebwyr yn dod â phigion o bob cyfeiriad ynghyd yma, ac yn cadw golwg ar y sefyllfa yng Nghymru a thu hwnt yn Lloegr, yr Alban a Gogledd Iwerddon.

Yn ogystal â golygyddion a gohebwyr golwg360, bydd yr academyddion Dr Huw Lewis (Prifysgol Aberystwyth) a Dr Edward Jones (Prifysgol Bangor), colofnwyr golwg360 Huw Prys Jones a Dylan Wyn Williams, sylfaenydd Golwg Dylan Iorwerth, y sylwebydd Elin Roberts, y colofnydd ac awdur Jason Morgan, a mwy yn cynnig dadansoddiadau a sylwebaeth hefyd. A bydd ambell un mewn etholaethau ledled Cymru wrth i ni agosáu at gyhoeddi’r canlyniadau.

20:30

Mae Mick Antoniw, Cwnsler Cyffredinol Cymru, wedi dweud hyn wrth golwg360 heno:

“Mae hi wir yn fater o sawl sedd fydd Plaid Cymru a’r Torïaid yn gallu dal gafael arnyn nhw.

“Ar y cyfan, mae bron pawb yn derbyn mai Llafur fydd yn ennill, ond beth fydd maint eu mwyafrif? Yr adborth cynnar yw fod niferoedd da wedi troi allan. Mae’r tywydd wedi helpu, ac mae llawer o bleidleiswyr ifainc wedi troi allan, sy’n beth da i Lafur.

“Mae Sir Gaerfyrddin, Sir Drefaldwyn ac Ynys Môn yn agos iawn, iawn. Mae pob pleidlais yn cyfri!”

19:50

Mae Aled a Twm wedi bod draw i bleidleisio. Ydych chi a’ch ffrindiau pedair coes wedi bod draw i’r orsaf bleidleisio eto?

18:53

Mae Sara Louise Wheeler, colofnydd golwg360, am fod yn y cyfrif yn Wrecsam ac wedi anfon y lluniau hyn draw. Rhagor ganddi hi yn nes ymlaen heno.

17:31

Dyma ailagor y blog wrth i ni glywed gan Rhys Owen, ein Gohebydd Gwleidyddol, sy’n bwriadu casglu barn ambell un ar ei ffordd o Wrecsam i Langefni heno…

Mae e newydd fod yn Erddig, lle bu’n siarad ag ambell bleidleisiwr tu allan i’r orsaf bleidleisio.

Dyma farn un sy’n pleidleisio am y tro cyntaf… 

“Hwn yw’r tro cyntaf i mi bleidleisio, a dw i wedi bod yn cynhyrfu i wneud hyn ers sbel. I fi, mae rhaid gweld newid yma yn Wrecsam ac ar draws Prydain, a dw i’n gobeithio y bydd y ffordd dw i wedi pleidleisio heddiw yn helpu tuag at y newid yma.

“Y prif amcan i fi wrth bleidleisio heddiw oedd cyfleoedd i bobol ifanc. Does yna ddim digon i ni fod yn gyffrous amdano, felly dyna be dw i wir eisiau gweld newid ynddo dros y blynyddoedd nesaf.”

Lily Farnham, 19

… ac un bodlon ei fyd sydd wedi pleidleisio o’r blaen…

“Dw i wedi pleidleisio ambell i waith yn y gorffennol.

“Ond y tro yma, dwi’n eithaf hapus efo sefyllfa ein gwlad ar hyn o bryd a dw i ddim isio gweld llawer o newid oherwydd dwi’n hapus os dw i’n gallu gweithio a bod yna digon o waith o gwmpas.

“Dw i’n meddwl bod yna ddigon o hynny ar hyn o bryd.”

Beiker Boslack, 47

16:48

Dyna ni am y tro!

Byddwn ni’n ôl ar ein blog byw canlyniadau o 10 o’r gloch ymlaen. Dewch yn ôl aton ni bryd hynny.

Bydd ein tîm o ohebwyr, golygyddion, sylwebyddion a cholofnwyr yn eich tywys chi drwy noson o ganlyniadau ac ymateb o bob cwr o Gymru a thu hwnt.

Yn y cyfamser, sgroliwch yn ôl drwy’r blog byw yma i gael blas ar gynnwys ein tudalennau gwleidyddol, a rhowch wybod i ni sut fyddwch chi’n treulio’r noson wrth aros am y canlyniad terfynol.

Noswaith dda!

15:30

Beth am brofi’ch gwybodaeth am yr etholiad drwy roi cynnig ar ein cwis…? Rhowch wybod i ni sawl pwynt gawsoch chi!

Papur pleidleisio'n cael ei roi yn y blwch

Cwis mawr yr Etholiad Cyffredinol 2024

Bethan Lloyd

Faint ydach chi’n ei gofio am rai o’r straeon newyddion sydd wedi hawlio’r sylw ar drothwy’r etholiad?

15:04

Neges bwysig fan hyn gan Gyngor Caerdydd, ond un sy’n berthnasol i bleidleiswyr ym mhob cwr o Gymru:

14:27

Papur pleidleisio'n cael ei roi yn y blwch

Ydych chi’n gwybod lle mae eich gorsaf bleidleisio leol? Cliciwch fan hyn i gael gwybod.

13:02

Bydd Huw yn cynnig dadansoddiadau i ni ar noson yr etholiad heno. Dyma sut mae’n ei gweld hi ar drothwy noson fawr i’r holl bleidiau…

Rhun ap Iorwerth yng nghynhadledd Plaid Cymru

Colofn Huw Prys: Etholiad mwy ffafriol na’r disgwyl i Blaid Cymru?

Huw Prys Jones

Wrth i’r Torïaid wynebu chwalfa debygol, beth fydd effaith hyn ar ragolygon y pleidiau eraill yng Nghymru yn yr etholiad ddydd Iau?

11:21

Dyma pryd y gallwn ni ddisgwyl clywed y canlyniadau’n cael eu cyhoeddi yng Nghymru dros nos:

02:00

Bro Morgannwg

Gorllewin Abertawe

02:15

Gŵyr

02:30

Caerffili

Gogledd Clwyd

Gorllewin Casnewydd ac Islwyn

03:00

Alun a Glannau Dyfrdwy

Bangor Aberconwy

Dwyfor Meirionnydd

Dwyrain Casnewydd

Rhondda ac Ogwr

Torfaen

Wrecsam

Ynys Môn

03:15

Caerfyrddin

Llanelli

Merthyr Tudful ac Aberdâr

Pontypridd

04:00

Aberafan Maesteg

Aberhonddu, Maesyfed a Chwm Tawe

Blaenau Gwent a Rhymni

Canol a De Sir Benfro

Ceredigion Preseli

De Caerdydd a Phenarth

Dwyrain Caerdydd

Dwyrain Clwyd

Pen-y-bont ar Ogwr

04:30

Castell-nedd a Dwyrain Abertawe

Gogledd Caerdydd

Maldwyn a Glyndŵr

Sir Fynwy

04:45

Gorllewin Caerdydd