Nid fi yw hwn
Er mwyn gadael sylw, mae angen mewngofnodi neu ymuno â’r safle.
gan
Garmon Ceiro
Blog byw Etholiad Senedd 2021 gyda fi, Garmon Ceiro, yng nghwmni Gohebydd Senedd Golwg, Iolo Jones, colofnydd Golwg, Jason Morgan, gohebydd golwg360 Cadi Dafydd… gyda chyfraniadau gan y sylwebyddion gwleidyddol Dafydd Trystan a Huw Prys Jones, Dr Huw Lewis o Brifysgol Aberystwyth, a chyd-sefydlydd Golwg, Dylan Iorwerth.
Dilynwch flog byw dydd Sadwrn am y diweddaraf.
Un arall yn cadw ei sedd…. Ken Skates yn cadw De Clwyd yn goch….
Sedd oedd wedi’i thargedu gan y Ceidwadwyr.
Buddugoliaeth glir Llafur yng Nghaerffili yn sicr o fod yn siom i Blaid Cymru, eto i gyd perfformiad cadarn gan Delyth Jewell, un o sêr ifanc y Blaid. Mae’n dibynnu’n hollol pa mor uchel oedd y gobeithion yn y lle cyntaf. Plaid Cymru bob amser â phresenoldeb cadarn yng Nghaerffili ers is-etholiad 1968 pan ddaeth Phil Williams o fewn llai na 2000 o bleidleisiau i gipio’r sedd seneddol, ond erioed wedi llwyddo i dorri trwodd yma.
Llafur yn fuddugol yn Islwyn.
Mae’r canlyniadau yn hedfan atom ni nawr. Er bod pethau’n dechre poethi, rhaid cofio bod y seddi mwyaf cyffrous eto i ddod. Gan eithrio Dyffryn Clwyd ry’n ni ond wedi gweld gwleidyddion cyfarwydd yn cadw’i seddi… Rhagor o gyffro i ddod!
Mae Paul Windsor Davies wedi llwyddo i gadw Preseli Penfro, er gwaetha’ perfformiad cry’ iawn gan Lafur ac un da gan Blaid Cymru.
Mae yna batrwm arall cyfarwydd yn datblygu – bod aelodau presennol yn cadw eu seddi.
Gyda’r pandemig, mae wedi bod yn fwy anodd nag arfer i herwyr wneud eu marc.
Y Ceidwadwyr yn cadw Preseli Penfro.
Fel yn Nelyn gwelwyd cynnydd (bach) ym mhleidlais Llafur a’r Ceidwadwyr yn Wrecsam, ond yn wahanol i etholiad San Steffan yn 2019 Llafur sy’n dal ei gafael ar y sedd, a hynny gyda mwyafrif digon tebyg i 2016.
Unwaith eto, y newid mawr ers 2016 yw’r cwymp o 10% ym mhleidlais UKIP. Fodd bynnag dyw canlyniadau Wrecsam a Delyn ddim yn awgrymu bod hwn yn llifo’n syth tuag at y Ceidwadwyr yn y Gogledd Ddwyrain fel roedd rhai yn rhengoedd y blaid wedi gobeithio.
O’r diwedd cyfres o ganlyniadau, ond y patrwm a sefydlwyd yn cael ei gadarnhau.
Wedi gobeithion mawr, canlyniadau siomedig i’r Ceidwadwyr o ran cipio seddi – er y bydd yn rhaid cadw golwg ar y rhestri i weld os yw’r gynnydd yn y bleidlais geidwadol yn eu cynothwyo.
Gall Llafur fod yn hapus iawn gyda phob un o’r canlyniadau hynny, ac o ran Plaid Cymru yng nghanol canlyniadau digon siomedig canlyniad Carrie Harper yn Wrecsam yn sefyll allan fel un o ser y dyfodol i’r Blaid honno.
Tybed a fydd hynny’n ddigon i’w hethol oddi ar y rhestr – bydd hynny yn frwydr ddifyr iawn
Canlyniadau Delyn a Wrecsam yn dda iawn i Lafur. Ac eithrio Dyffryn Clwyd a Bro Morgannwg, byddwn wedi disgwyl mai’r seddau hyn oedd dan fwyaf o fygythiad iddyn nhw, mwyafrif da ganddyn nhw yn Delyn hefyd.
Y llif canlyniadau yn dangos bod Llafur wedi dal eu tir yn rhyfeddol o dda – er gwaetha’ ambell her.
Dydi’r bleidlais UKIP ddim wedi mynd at y Ceidwadwyr yn y seddi Llafur.
Mae’r pleidiau bach yn gwneud yn wael iawn sy’n golygu nad ydyn nhw’n debyg o gael seddi rhanbarthol chwaith…