Etholiad Senedd 2021 – dydd Gwener

Sgriwtini – gormod ynteu ddiffyg?

Roedd David TC Davies, Aelod Seneddol Sir Fynwy, yn ddigon swrth wrth siarad â BBC Wales rhai munudau yn ôl.

Roedd yn siarad fel pe bai’r Ceidwadwyr eisoes wedi profi etholiad gwael yng Nghymru – er bod ganddyn nhw fwy o seddi nag unrhyw blaid ar hyn bryd.

A’r cyfryngau oedd yn cael y bai.

“A phob parch i chi – a dw i ddim yn pigo ar y BBC yn benodol – ond dw i ddim yn credu bod Llywodraeth llafur Cymru yn wynebu unrhyw beth tebyg i’r lefel o sgriwtini a Llywodraeth San Steffan,” meddai.

“Dw i ddim hyd yn oed yn siŵr os oes digon o [newyddiadurwyr] yno i roi Llafur dan yr un lefel o sgriwtini â San Steffan.”

Mae’r mater yma yn un diddorol.

Yn siarad â Golwg rhai wythnosau yn ôl dywedodd Lee Waters, AoS Llafur, bod ei blaid yntau yn wynebu llawer yn fwy o sgriwtini na’r pleidiau eraill.

Heb os mae’r cynadleddau wasg covid-19 wedi codi proffil ffigyrau o’r blaid Llafur, ac os caiff Llafur noson dda allwn ddisgwyl tipyn o gwyno am hyn gan y gwrthbleidiau.

Llafur yn cadw Delyn gyda mwyafrif o 3,711.

Llafur yn cadw Delyn.

Er fod y Ceidwadwyr wedi codi eu pleidlais yn Nelyn, mi wnaeth Llafur yr un peth wrth i Hannah Blythyn guro – dydi ffenomenon Hartlepool ddim yn digwydd yn y gogledd-ddwyrain hyd yn hyn.

Hannah Blythyn wedi cadw Delyn i’r Blaid Lafur…

Pump o’r gloch, oriau o gyfrif, tri chanlyniad.

Bydd y sawl ohonoch oedd yn siomedig na fyddech chi’n cael noson etholiad efallai’n teimlo’n well fod hyn yn debygol o bara’n hirach na’r disgwyl!

Anfonwch fwyd i’r Rhondda…!

Iasu bois – aethon ni o awgrym bydde'r canlyniadau am 16:00 yn y Rhondda…erbyn hyn ni'n edrych ar "rywbryd heno" – bosib hyd yn oed yn hwyrach 'na 19:00.

A fi'n rhedeg mas o fwyd!!!

— Rhys Williams (@RhysWilliamsBBC) May 7, 2021

Er, ma Chris Bryant edrych fel se fe’n mwynhau…

"People wanted to give Plaid a chance last time and frankly, Leanne and Adam Price have blown it"

Labour MP @RhonddaBryant says Plaid Cymru have missed their opportunity in the Rhondda. #SeneddElection2021 https://t.co/GidcoiD9d8 pic.twitter.com/xgjBgsVys2

— ITV Wales News (@ITVWales) May 7, 2021

Eluned Morgan o’r Blaid Lafur yn awgrymu bod arweinydd Plaid Cymru, Adam Price, wedi colli rhywfaint o gefnogaeth trwy fod yn rhy “arlywyddol” a pheidio a rhoi llwyfan i rai fel Leanne Wood.

Y cyn-AoS o’r Blaid, Bethan Sayeed, yn lled-gytuno: “wastad yn well dangos ystod eang o ymgeiswyr”.

Mae’n llai nag wythnos ers i Adam Price ddweud ei fod yn disgwyl i Blaid Cymru gael “canlyniad hanesyddol” yn etholiadau’r Senedd eleni.

Gydag Aberconwy efallai’n dechrau llithro o’i gafael yn ôl rhai ffynonellau, a Llanelli yn ôl Llafur am ddychwelyd Lee Waters “yn braf”, bosib ei fod yn gywir, am y rhesymau anghywir.

A hithau’n edrych yn gynyddol debygol bod y Blaid am lithro’n ôl unwaith yn rhagor i ennill ei nifer leiaf o etholaethau, sef pump traddodiadol y Fro Gymraeg, erioed – fel yn 2003 a 2011 – tybed a oedd y disgwyliadau’n afrealistig?

A fydd achubiaeth ar y rhestri? Wel, fyddwn ni ddim yn gwybod hynny tan yfory!

Bodlonrwydd sy’n anfodloni

Yn siarad â BBC Wales mae Mark Drakeford wedi dweud na ddylwn fod yn anfodlon os nad yw tyrnowt yn llawer uwch eleni.

“Wel dw i’n credu yr oedd hi’n etholiad hynod anodd o ran tyrnowt,” meddai. “Dw i wedi cwrdd â phobol sydd yn nerfus ynghylch mynd i’r orsaf bleidleisio.

“Maen nhw’n bryderus am nad ydyn nhw wedi gadael eu tai cyhyd – wythnosau, os nad misoedd i rai.

“Rydym wedi gweld ciwiau mewn llawer o orsafoedd pleidleisio yma, gyda phobol yn troi am adre heb bleidleisio am ei fod yn cymryd cyhyd.

“Felly ar y cyfan mae’r amgylchiadau [wedi bod yn anodd] ac mae cyfyngiadau wedi bod ar yr ymgyrchu.

“Felly byddai cael tyrnowt jest ychydig yn uwch yng Nghymru, wel, ni ddylid peidio â chanmol hynny.”

Mae yna awgrym bod canran y rheiny a bleidleisiodd ar ei fyny ond ddim dros 50% – dyw’r tyrnowt erioed wedi cyrraedd 50%, heb sôn a bod yn uwch na hynny.

Ydy safiad Marky D yn dal dŵr? Sa i’n berffaith siŵr bod e’…

Wedi 20 mlynedd o ddatganoli, ac ar ôl deuddeg mis lle mae proffil Llywodraeth Cymru wedi bod yn uwch nag erioed, dylai fod y Cymry yn fwy parod nag erioed i fwrw pleidlais tros eu Senedd.

Onid methiant fyddai peidio a chael record o dyrnowt?

“Roedden ni’n disgwyl cael canlyniad da heddiw, ond roedden ni’n gwybod hefyd ein bod ni ddim am ennill,” meddai Glyn Davies, Cadeirydd y Ceidwadwyr Cymreig, am obeithion ei blaid heddiw.

“Roedd yn bwysig symud ymlaen o’r tro diwethaf.

Aeth Glyn Davies yn ei flaen i ddymuno “pob lwc” i’r Blaid Lafur,

“Dw i’n credu y bydd y Ceidwadwyr yn dod yn ail yn yr etholiad, dw i’n disgwyl i Lafur fod y blaid mwya.

“Mae wedi bod yn etholiad od iawn, bydd pawb yn dweud ein bod ni methu cnocio ar ddrysau, fod pobol ddim isio siarad, a dydyn ni methu cysylltu â phobol.”

Ychwanegodd Glyn Davies ei bod hi’n bwysig fod y Ceidwadwyr Cymreig yn symud ymlaen ar ôl yr etholiad.

"Dwi'n disgwyl i Lafur fod y blaid mwya"

Glyn Davies Cadeirydd y Ceidwadwyr Cymreig yn cydnabod na fydd ei blaid yn ennill yn yr etholiad.#Senedd2021 #Etholiad2021 pic.twitter.com/ruYeAiGFui

— Newyddion S4C (@NewyddionS4C) May 7, 2021