Etholiad Senedd 2021 – dydd Gwener

Sut i grynhoi diwrnod gyda sawl syrpreis yng Nghymru?

Wrth ddeffro roedd yr awgrymiadau o batrwm Lloegr yn peri pryder i Lafur – OND, mae’n amlwg erbyn hyn fod pobl wedi pleidleisio yn unol a’u gwethfawrogiad o waith gofalus a manwl Mark Drakeford fel Prif Weinidog.

Gall Llafur felly fod yn hapus iawn taw dim ond un sedd a gollwyd, ac fe ennillwyd y Rhondda yn ol.

Bydd y Ceidwadwyr, rwy’n tybio, yn siomedig – er gwaetha’r holl gobeithio dyw ennill Dyffryn Clwyd a Brycheiniog a Maesyfed yn fawr o return, pan mae’r blaid yn Lloegr yn gwneud gystal. Bydd Plaid Cymru yn siomedig rwy’n siwr – ond tybed oes cyfle ar y rhestrau.

Mae brwydr y rhestr yn dechrau siapio – bydd hi’n ymgiprys rhwng Plaid Cymru a’r Ceidwadwyr yn bennaf, ond fe all rhai o’r pleidiau llai ymgiprys am y bedwaredd sedd.

Noder ar y pwynt hwn fod canlyniadau y Democratiaid Rhyddfrydol cyn waethed y bydd hi’n syndod go iawn pe tai ganddynt gyfle am sedd rhanbarthol. Os am sioc yfory (neu’n hwyrach heno) gwylier am y Gwyrddion … mae’n anhebyg y byddant yn ennill sedd, ond o’r pleidiau bach nhw yw’r unig rhai sydd wedi perfformio’n gymeradwy mewn etholaethau.

Oni bai fod ‘na nifer o Doriaid yn benthyg eu hail bleidlais i Abolish rwy’n fodlon mentro erbyn hyn na fydd na aelodau Abolish yn y Senedd.

Y blaid Lafur yn cipio’r Rhondda oddi wrth Plaid Cymru.

Pleidlais Leanne Wood i lawr 19%

Buffy Williams wedi cipio’r Rhondda yn ol oddi wrth Leanne Wood a Phlaid Cymru gyda mwyafrif o bron 5,500

“Dydych chi ddim yn ennill etholiad yn yr wythnosau cyn yr etholiad,” meddai Ben Lake yn dilyn buddugoliaeth Elin Jones yng Ngheredigion.

Yn hytrach, mae’r gefnogaeth yn cael ei gasglu dros y blynyddoedd blaenorol, meddai.

“Byddwn ni’n gweithio gyda’n gilydd, dros y bobol i haeddu’r fath yna o gefnogaeth,” meddai Ben Lake.

“Rhaid cyfaddef ein bod ni’n mynd mewn i’r etholiad moyn ennill, mae hynny’n siomedig.”

Un peth sy’n “ganolog” meddai Ben Lake yw fod pethau ar newid mewn ardaloedd yng Nghymru lle nad yw Plaid Cymru wedi cael ymgeiswyr cyson, na gallu adeiladu cefnogaeth gyson.

Cyfeiriodd at y gefnogaeth ym Mhen-y-bont ar Ogwr, a Blaenau Gwent wrth drafod hynny.

“Mewn gwleidyddiaeth yng Nghymru, yn y Senedd, mae unigolyn yn gallu gwneud lot o wahaniaeth. Mae yna wleidyddiaeth ar lefel bersonol yng Nghymru.

“Fel y cyfryw mae deiliaid y seddi yn gwneud yn dda iawn,” meddai Ben Lake.

“Falle fod yna rywbeth ar lefel lleol iawn yn digwydd mewn ambell etholaeth, lle mae pobol yn cefnogi’r sawl sydd wedi’u cynrychioli nhw am y bum mlynedd ddiwethaf.”

Ail-ethol Lee Waters yn Llanelli.

Lee Waters wedi cadw Llanelli i’r Blaid Lafur….

Llafur yn cadw Gorllewin Casnewydd.

Mae Chris Bryant, Aelod Seneddol y Rhondda, wedi rhannu fideo o’i hun yn talu teyrnged i Leanne Wood, Aelod o’r Senedd Rhondda, am ei gwaith, wedi iddi golli ei sedd…

Beth sy’n rhyfedd yw bod canlyniad y Rhondda heb gael ei gyhoeddi eto! Ac roedd Chris Bryant yn swnnio’n ddigon hapus â’r syniad ohoni’n colli’i sedd yn gynt yn y dydd!

It looks as if Labour has taken the Rhondda off Plaid so I want to pay tribute to Leanne Wood after 18 years as AM/MS for/in the Rhondda, which is a phenomenal act of dedication to our community. pic.twitter.com/3xlSIDOhyc

— Chris Bryant (@RhonddaBryant) May 7, 2021

Buddugoliaeth ysgubol I Blaid Cymru yng Ngheredigion, patrwm tebyg I etholaethau Gwynedd a Môn. Elin Jones wedi bod yn aelod gweithgar ac adnabyddus ers 1999 ac efallai wedi elwa ar amlygrwydd pellach fel llywydd.

Y Toriaid wedi methu’n llwyr â gwneud unrhyw argraff yng nghadarnleoedd Plaid Cymru.

Wrth i’r Democratiaid Rhyddfrydol ddod yn bedwerydd mewn sedd y buon nhw’n ei dal ar lefel San Steffan tan 2017, gallwn ddweud yn sicr nad oes ganddyn nhw fawr o obaith am sedd ar restr y Canolbarth bellach. Anodd credu na fydd hyn yn ergyd farwol iddyn nhw fel plaid yng Nghymru.