Nid fi yw hwn
Er mwyn gadael sylw, mae angen mewngofnodi neu ymuno â’r safle.
gan
Garmon Ceiro
Blog byw Etholiad Senedd 2021 gyda fi, Garmon Ceiro, yng nghwmni Gohebydd Senedd Golwg, Iolo Jones, colofnydd Golwg, Jason Morgan, gohebydd golwg360 Cadi Dafydd… gyda chyfraniadau gan y sylwebyddion gwleidyddol Dafydd Trystan a Huw Prys Jones, Dr Huw Lewis o Brifysgol Aberystwyth, a chyd-sefydlydd Golwg, Dylan Iorwerth.
Dilynwch flog byw dydd Sadwrn am y diweddaraf.
Y Ceidwadwyr yn cadw Gorllewin Caerfyrddin a De Sir Benfro gyda mwyafrif o 936.
De Clwyd yn dilyn patrwm tebyg i Delyn a Wrecsam – cynnydd (mwy y tro hwn) yn y bleidlais i’r Ceidwadwyr, ond y bleidlais i Lafur hefyd yn codi (o 8%), tra bod y bleidlais i UKIP ers 2016 yn chwalu.
Mae’r canlyniadau hyn yn y gogledd ddwyrain yn rhai arbennig o dda i Lafur ac yn rhai siomedig i’r Ceidwadwyr oedd yn hyderus iawn ynghylch y seddi hyn rai misoedd yn ôl.
Mwyafrif o 8,652 i Siân Gwenllian yn Arfon.
“Dw i’n llawenhau yn llwyddiant fy nghyfeillion… ym Mhlaid Cymru a’r Blaid Lafur” medd… dyfalwch pwy? Dafydd Elis Thomas.
“Wnes i bleidleisio dros Mark Drakeford” meddai.
Clamp o fuddugoliaeth i Siân Gwenllian yn Arfon, mwyafrif o bron 40% a 8,652 o bleidleisiau. Cryn ganlyniad yn sedd leiaf poblog Cymru.
Mae’r 13,760 o bleidleisiau gafodd hi y nifer fwyaf i Blaid Cymru ei chael mewn unrhyw etholiad erioed, boed yn y Senedd neu San Steffan.
Mewn ffordd dylai hon fod yn un o’r canlyniadau mwyaf siomedig i Lafur yng Nghymru, a hwythau’n cael diwrnod cystal. Doedd hi ond ddwy flynedd yn ôl iddyn nhw dargedu’r sedd hon yn San Steffan. Sedd brin sy’n edrych o’u cyrraedd bosib.
“Canlyniadau Llafur yn dda iawn” medd Richard Wyn Jones ar S4C… “ac anodd rhagweld grwp mawr o ddiddymwyr yn cyrraedd y Senedd”.
Mae Vaughan Gething, sy’n gobeithio cael ei ail-ethol dros y Blaid Lafur, wedi dweud fod heddiw’n “ddiwrnod gweddol gadarnhaol i ni hyd yn hyn.”
“Rydyn ni wedi dringo mynydd i ennill. Rydyn ni’n disgwyl mai’r Blaid Lafur fydd y blaid fwyaf yn Senedd Cymru.
“Canlyniadau positif iawn i ni yn Nelyn a Wrecsam, ac yng Nghaerffili.
“Mae’r ymateb i’r pandemig wedi bod yn bwysig ar y stepen drws, a chafodd ei godi’n amlach na’r un mater arall.
“Mae’r ffordd y mae Mark Drakeford wedi trin y pandemig wedi dylanwadu ar y ffordd y gwnaeth pobol bleidleisio ddoe.”
Dywedodd Vaughan Gething fod rhaid aros nes clywed mwy o ganlyniadau cyn gallu dweud sut fydd y Llywodraeth nesaf yn edrych.
Ken Skates yn ennill mwyafrif o 2,913 yn Ne Clwyd.
Un arall yn cadw ei sedd…. Ken Skates yn cadw De Clwyd yn goch….
Sedd oedd wedi’i thargedu gan y Ceidwadwyr.
Buddugoliaeth glir Llafur yng Nghaerffili yn sicr o fod yn siom i Blaid Cymru, eto i gyd perfformiad cadarn gan Delyth Jewell, un o sêr ifanc y Blaid. Mae’n dibynnu’n hollol pa mor uchel oedd y gobeithion yn y lle cyntaf. Plaid Cymru bob amser â phresenoldeb cadarn yng Nghaerffili ers is-etholiad 1968 pan ddaeth Phil Williams o fewn llai na 2000 o bleidleisiau i gipio’r sedd seneddol, ond erioed wedi llwyddo i dorri trwodd yma.