Nid fi yw hwn
Er mwyn gadael sylw, mae angen mewngofnodi neu ymuno â’r safle.
gan
Alun Rhys Chivers
Clwb Criced MorgannwgBrad Wheal
Mae gan dîm criced Morgannwg fowliwr cyflym arall eto fyth ar gyfer eu taith i Swydd Northampton yn y Bencampwriaeth heddiw (dydd Gwener, Ebrill 19).
Mae Brad Wheal wedi ymuno ar fenthyg o Hampshire, a bydd ei gytundeb yn parhau un gêm ar y tro.
Mae Timm van der Gugten, Jamie McIlroy a Harry Podmore allan ag anafiadau, ac mae Craig Miles bellach wedi dychwelyd i Swydd Warwick ar ôl chwarae un gêm ar fenthyg i’r sir, er mai tair gêm oedd y cytundeb gwreiddiol cyn iddo fe gael ei alw’n ôl.
Ymhlith y batwyr, mae Eddie Byrom allan o hyd, ond fe fydd e’n chwarae i’r ail dîm yr wythnos nesaf wrth frwydro i ddychwelyd i’r tîm cyntaf yn holliach.
Mae Morgannwg wedi brwydro yn eu gemau hyd yn hyn, oddi cartref yn erbyn Middlesex ac wedyn gartref yn erbyn Swydd Derby, ond gorffennodd y ddwy yn gyfartal.
Maen nhw’n bedwerydd yn yr Ail Adran ar hyn o bryd.
Gemau’r gorffennol
Dydy Morgannwg ddim wedi chwarae yn y Bencampwriaeth yn Northampton ers 2021, pan enillodd y tîm cartref ar y diwrnod olaf.
Wrth gwrso 355 i ennill, adeiladodd Ricardo Vasconcelos a Rob Keogh bartneriaeth o 239 mewn 46 pelawd i gipio’r fuddugoliaeth gyda 6.2 pelawd yn weddill.
Y flwyddyn gynt, tarodd Callum Taylor ganred yn ei gêm gyntaf i Forgannwg, a chyrhaeddodd Marchant de Lange ganred cyflymaf erioed Morgannwg oddi ar 62 o belenni.
Ond y Saeson oedd yn fuddugol, a hynny o chwe wiced yn y gêm undydd yn Nhlws Bob Willis.
Roedd Morgannwg yn fuddugol o fatiad a 143 o rediadau yn 2019, wrth i Billy Root osod y seiliau gyda 229, ei sgôr gorau erioed, wrth i Forgannwg sgorio 547 yn eu batiad cyntaf.
Cafodd y Saeson eu bowlio allan am 209 a 195 i sicrhau buddugoliaeth gyfforddus i Forgannwg.
Cyn hynny, doedd Morgannwg ddim wedi ennill yn y Bencampwriaeth yn Northampton ers 2012 – hon oedd eu deuddegfed fuddugoliaeth yn Wantage Road mewn criced dosbarth cyntaf.
Carfan Swydd Northampton: L Procter (capten), G Bartlett, J Broad, E Gay, R Keogh, L McManus, G Miller, K Nair, J Sales, B Sanderson, C Tremain, R Vasconcelos, R Weatherall, S Zaib
Carfan Morgannwg: S Northeast (capten), K Carlson, Zain ul Hassan, B Root, C Ingram, C Cooke, D Douthwaite, J Harris, Mir Hamza, M Crane, A Gorvin, A Tribe, B Wheal
WICED
Wiced gyntaf i Brad Wheal yng nghrys Morgannwg. George Bartlett wedi’i ddal yn y slip gan Sam Northeast. Swydd Northampton 349 am bedair.
Dim record i Vasconcelos. Mae e allan am 182, wedi’i ddal gan y wicedwr Chris Cooke. Wiced i Mir Hamza. Swydd Northampton 336 am dair.
Bore da ar ddechrau’r trydydd diwrnod. Mae Ricardo Vasconcelos yn llygadu ei sgôr gorau erioed (185). Daeth hwnnw yn erbyn y sir Gymreig yn 2021.
Diwedd yr ail ddiwrnod. Swydd Northampton 314 am ddwy. Vasconcelos 166hfa, Nair 55hfa. Ar y blaen o 43 rhediad.
Hanner canred i Karun Nair. Swydd Northampton 297 am ddwy. Pum pelawd i ddod heno.
150 i Ricardo Vasconcelos. Swydd Northampton yn adeiladu blaenoriaeth sy’n debygol o fod yn sylweddol, 288 am ddwy. Luke Procter allan yn gynharach am 65 wrth i bartneriaeth o 191 ddod i ben.
Amser te – Swydd Northampton 133 am un. Ricardo Vasconcelos 69 heb fod allan, Luke Procter 40 heb fod allan. Partneriaeth o 113 hyd yn hyn.
CINIO – Swydd Northampton 31 am un. Wiced i James Harris wrth waredu Emilio Gay.
DIWRNOD 2
Morgannwg 271 i gyd allan (Mason Crane 61). Pum wiced i Ben Sanderson am 92
Morgannwg wedi gorffen y diwrnod cyntaf ar 203 am saith. Hanner canred yr un i Colin Ingram (69 heb fod allan) a Dan Douthwaite (50). Partneriaeth o 74 rhyngddyn nhw wedi achub y sir Gymreig.