Ar ôl i’r Ysgrifennydd Cartref Suella Braverman gael ei diswyddo, mae Rishi Sunak, Prif Weinidog y Deyrnas Unedig, yn manteisio ar y cyfle i ad-drefnu ei gabinet.
Mae’r Ysgrifennydd Tramor James Cleverly wedi’i benodi i’w holynu, a David Cameron, cyn-Brif Weinidog y Deyrnas Unedig, sy’n camu i’r swydd honno.
Dilynwch y datblygiadau diweddaraf yma ar golwg360…
Mae Rishi Sunak bellach wedi dychwelyd i Downing Street, ond fe ddown ni â’r diweddaraf i chi os daw rhagor o ddatblygiadau.
Gweinidog arall sydd wedi gadael yw Jesse Norman (Trafnidiaeth)
Ar ôl gadael Radio Wales yn sgil ei negeseuon gwleidyddol ar X (Twitter gynt), mae Carol Vorderman wedi bod yn dweud ei dweud am y sefyllfa.
“Doedd gan Suella Braverman ddim cywilydd,” meddai.
“Ac rŵan mae hi wedi’i diswyddo, rydym yn mynd i mewn i gyfnod newydd o gythrwfl gan Brif Weinidog anetholedig a’i gabál o blaid.”
Dydy David Cameron ddim wedi bod yn Aelod Seneddol ers 2016, ar ôl iddo fe ymddiswyddo tros helynt Brexit. Fe alwodd y refferendwm, gan ymgyrchu o blaid aros.
Ond daw ei benodiad diweddaraf ar ôl iddo fe gael sedd yn Nhŷ’r Arglwyddi am weddill ei oes.
Mae’n werth edrych eto ar sylwadau Suella Braverman ddoe.
“Mae’r siantio, placardiau a pharaffernalia ffiaidd, ymfflamychol ac mewn rhai achosion troseddol oedd yn cael eu harddangos yn yr orymdaith yn nodi isafbwynt newydd.
“Mae gwrth-Semitiaeth a ffurfiau eraill ar hiliaeth, ynghyd â rhoi gwerth ar frawychiaeth ar y fath raddfa’n drafferthus dros ben.
“All hyn ddim parhau. Bob wythnos, mae strydoedd Llundain yn cael eu llygru gan gasineb, trais a gwrth-Semitiaeth.
“Mae aelodau’r cyhoedd yn cael eu pledu a’u bygwth. Mae pobol Iddewig yn benodol yn teimlo dan fygythiad.
“Mae gweithredu pellach yn angenrheidiol.”
Rhagor gan Chris Bryant fan hyn am benodiad David Cameron:
“Dw i ddim yn gweld sut mae penodi Cameron yn helpu Sunak i ffurfio llywodraeth o onestrwydd a phroffesiynoldeb (Greensill) nac yn cynrychioli newid (pan fo’i Ysgrifennydd Tramor yn ymgorfforiad byw o’u 13 mlynedd mewn grym).
Mae cyn-Brif Weinidog y Deyrnas Unedig, David Cameron, wedi ymateb i’w benodiad fel Ysgrifennydd Tramor gan ddweud ein bod yn wynebu “cyfres frawychus o heriau rhyngwladol” a bydd yn “fraint gwasanaethu’r wlad”.
“Rydym yn wynebu cyfres frawychus o heriau rhyngwladol, gan gynnwys y rhyfel yn Wcrain a’r argyfwng yn y Dwyrain Canol.
“Ar yr adeg hon o newid byd-eang dwys, yn anaml y bu’n bwysicach i’r wlad hon sefyll wrth ein cynghreiriaid, cryfhau ein partneriaethau a sicrhau bod ein llais yn cael ei glywed.
“Er fy mod wedi bod allan o wleidyddiaeth rheng flaen am y saith mlynedd diwethaf, rwy’n gobeithio y bydd fy mhrofiad – fel Arweinydd y Ceidwadwyr am 11 mlynedd a Phrif Weinidog am chwech – yn fy helpu i helpu’r Prif Weinidog i ymateb i’r heriau hyn.
“Er efallai fy mod wedi anghytuno â rhai penderfyniadau unigol, mae’n amlwg i mi fod Rishi Sunak yn Brif Weinidog cryf a galluog, sy’n dangos arweinyddiaeth ragorol ar adeg anodd.
“Rwyf am ei helpu i sicrhau’r diogelwch a’r ffyniant sydd ei angen ar ein gwlad a bod yn rhan o’r tîm cryfaf posibl sy’n gwasanaethu’r Deyrnas Unedig a gellir cyflwyno hynny i’r wlad pan gynhelir yr Etholiad Cyffredinol.
“Bydd yn anrhydedd gwasanaethu ein gwlad ochr yn ochr â’n staff ymroddedig FCDO a darparu’r arweinyddiaeth a’r gefnogaeth barhaus y maent yn eu haeddu.”
Mae cyn-Brif Weinidog arall, Theresa May, wedi croesawu penodiad David Cameron.
“Llongyfarchiadau i @David_Cameron ar ddychwelyd i’r llywodraeth,” meddai Theresa May.
“Bydd ei brofiad helaeth ar y llwyfan rhyngwladol yn amhrisiadwy ar yr adeg hon o ansicrwydd mawr yn ein byd.
“Gan edrych ymlaen at gydweithio eto!”
Ar Rishi Sunak mae’r bai, yn ôl Liz Saville Roberts, Aelod Seneddol Plaid Cymru dros Ddwyfor Meirionnydd ac arweinydd y Blaid yn San Steffan.
“Pe na bai Rishi Sunak wedi bod mor wan ag ail-gyflogi Suella Braverman chwe niwrnod ar ôl iddi gael ei diswyddo ddiwethaf, gallai fod wedi osgoi’r anhrefn yma,” meddai.
“Roedd gan Liz Truss reddf wleidyddol well, hyd yn oed.
“Mae pobol yng Nghymru wedi diflasu â’r seicoddrama hon yn San Steffan.”
Ychwanega nad oes “arlliw o esgus atebolrwydd democrataidd” bellach.
“Mae obsesiwn y Torïaid â dal gafael ar rym y tu hwnt i barodi,” meddai.
Mae gwleidydd Llafur bellach yn galw am etholiad cyffredinol.
“Dim ots am ad-drefnu’r llywodraeth,” meddai Jo Stevens, Aelod Seneddol Canol Caerdydd.
“Yr hyn sydd ei angen ar y wlad yw etholiad cyffredinol.”
