Nid fi yw hwn
Er mwyn gadael sylw, mae angen mewngofnodi neu ymuno â’r safle.
Bydd tîm pêl-droed Cymru’n croesawu Montenegro i Stadiwm Dinas Caerdydd heno (nos Lun, Hydref 14), yn y gobaith o gynnal eu rhediad di-guro ers i Craig Bellamy gael ei benodi’n rheolwr.
Cawson nhw gêm gyfartal 2-2 yn erbyn Gwlad yr Iâ yn Reyjkavik yng Nghynghrair y Cenhedloedd nos Wener (Hydref 11), ac maen nhw bellach yn ddi-guro mewn tair gêm yn y gystadleuaeth.
Mae diolch mawr am hynny i Brennan Johnson, sydd bellach wedi sgorio saith gôl mewn saith gêm, ond mae e wedi’i wahardd heno yn dilyn cerdyn melyn nos Wener.
Bu’n rhaid i Gymru chwarae heb Aaron Ramsey ac Ethan Ampadu yn Reykjavik oherwydd anafiadau sy’n parhau, a fydd Jordan James ddim ar gael chwaith gan fod yntau hefyd wedi’i wahardd yn sgil cerdyn melyn.
Dydy Joe Allen ddim yn holliach, er ei fod e wedi cyhoeddi tro pedol ar ei ymddeoliad gan ddychwelyd i’r garfan ryngwladol ar gyfer y gêm ddiwethaf.
Y gwrthwynebwyr
Un fydd ddim ar gael i Montenegro yw Milutin Osmajic, sydd wedi bod dan y lach yn ddiweddar am frathu’r Cymro Owen Beck mewn gêm rhwng Preston a Blackburn.
Mae’r gŵr o Montenegro wedi’i wahardd am wyth gêm yn sgil y digwyddiad yn Deepdale fis diwethaf.
Mae ei dîm cenedlaethol ar waelod y grŵp, a dydyn nhw ddim wedi ennill yr un pwynt eto.
Twrci sydd ar y brig, gyda saith pwynt hyd yn hyn.
Bydd Cymru’n teithio i’r wlad honno fis nesaf, ac mae ganddyn nhw bum pwynt hyd yma, gyda Gwlad yr Iâ y tu ôl iddyn nhw ar bedwar.
Byddai cipio’r ail safle yn golygu gêm ail gyfle i dîm Craig Bellamy fis Mawrth nesaf.
Chwarae am 90 munud cyfan
Yn ôl Iwan Roberts ar raglen Sgorio, mae’n hanfodol bod Cymru’n chwarae’n gystadleuol am 90 munud cyfan.
“Roeddwn i’n meddwl ein bod ni wedi chwarae’n dda iawn yn yr hanner cyntaf yn erbyn Twrci, ond yn yr ail hanner roeddwn i’n meddwl bo ni ddim hanner cystal,” meddai.
“Doedden ni ddim yn edrych fel sgorio, doeddwn i ddim yn meddwl, ac roedden nhw i lawr i ddeg o chwaraewyr.
“Yn erbyn Montenegro [fis diwethaf], roeddwn i’n meddwl ein bod ni braidd yn ffodus i ddod o ’na efo’r triphwynt, i ddweud y gwir.
“Os wyt ti’n edrych ar y cyfleon gafodd Montenegro… gaethon nhw gyfleoedd da i sgorio mwy nag un gôl.”
Ychwanega fod angen “mwy o gysondeb a pherfformiad llawn” heno.
Bydd golwg360 yn dod â’r cyfan o’r gêm i chi.