Morgannwg v Sussex: Y sir Gymreig yn ennill gêm gyffrous ar y Gnoll

WICED!

Timm van der Gugten wedi cael ei ddal ar y ffin gan Lion-Cachet wrth fynd am ergyd fawr oddi ar fowlio Lenham.

Morgannwg 187 am naw, a Jamie McIlroy yw’r batiwr olaf.

WICED!

Y wiced fawr. Billy Root allan am 48, wedi’i ddal gan y wicedwr Tear oddi ar fowlio Ibrahim.

Morgannwg 181 am wyth, a Sussex ar y droed flaen unwaith eto.

Andy Gorvin sy’n ymuno â Timm van der Gugten yn y canol.

Ar ôl 40 pelawd, Morgannwg 178 am saith.

Fe fu sawl llanw a thrai yn ystod y dydd, ond mae’r sir Gymreig ar y droed flaen unwaith eto.

“Rooooooooooooot!”

Mae Billy Root newydd daro ergyd chwech enfawr i gyfeiriad y babell letygarwch. Tarodd y bêl y to cyn bownsio dros y top.

Morgannwg 151 am saith ym mhelawd rhif 34.

50 i ennill. Digon o belawdau i ddod, ond mae’r wicedi’n bryder.

Mae’n rhaid dechrau ystyried y posibilrwydd y gallai Morgannwg golli’r ornest hon o sefyllfa le ddylen nhw fod wedi ei hennill hi.

Maen nhw wedi colli saith wiced mewn llai na 21 pelawd, a Billy Root yw’r batiwr cydnabyddedig olaf bellach.

WICED!

Dan Douthwaite allan, wedi’i ddal gan Tom Haines yn y slip oddi ar fowlio Lenham.

Morgannwg 143 am saith, ond mae’r targed DLS bellach wedi codi i 160. Yn ffodus iawn i Forgannwg, mae’n ymddangos bod y glaw wedi cilio am y tro, er ei bod hi’n dywyll o hyd.

Timm van der Gugten sydd wrth y llain.

WICED!

Ben Kellaway wedi’i ddal gan Tom Clark yn y cyfar oddi ar fowlio’r troellwr coes Archie Lenham.

Morgannwg 141 am chwech ym mhelawd rhif 29, ac maen nhw un rhediad yn unig ar y blaen i DLS bellach.

Dan Douthwaite yw’r batiwr newydd.

Mae’n dechrau bwrw nawr, ond yn ysgafn. Gawn ni weld beth fydd yn digwydd, ond mae’r chwaraewyr am aros ar y cae am y tro.

Ar hyn o bryd, mae Morgannwg ar y blaen i DLS.

Hanner ffordd drwy’r pelawdau.

Morgannwg 122 am bump, dri rhediad ar y blaen i sgôr gofynnol DLS. Mae’n dal i fod yn dywyll, ond mae’r glaw wedi cadw draw hyd yn hyn.

WICED!

Colin Ingram allan, wedi’i ddal gan Tom Haines oddi ar fowlio Bertie Foreman am unarddeg.

Morgannwg 107 am bump oddi ar ugain pelawd, ar ôl bod yn 80 am un.

201 yw’r nod, ac mae digon o amser a phelawdau ar ôl, ond bydd y wicedi’n bryder iddyn nhw nawr.

Billy Root a Ben Kellaway sydd wrth y llain.