Morgannwg v Sussex: Y sir Gymreig yn ennill gêm gyffrous ar y Gnoll

Archie Lenham wedi gorffen ei ddeg pelawd. Tair wiced am 29.

Morgannwg 192 am naw ar ôl 45 pelawd.

Naw i ennill….

Morgannwg 190 am naw ar ôl 44 pelawd.

Unarddeg – neu un wiced – i ennill…

WICED!

Timm van der Gugten wedi cael ei ddal ar y ffin gan Lion-Cachet wrth fynd am ergyd fawr oddi ar fowlio Lenham.

Morgannwg 187 am naw, a Jamie McIlroy yw’r batiwr olaf.

WICED!

Y wiced fawr. Billy Root allan am 48, wedi’i ddal gan y wicedwr Tear oddi ar fowlio Ibrahim.

Morgannwg 181 am wyth, a Sussex ar y droed flaen unwaith eto.

Andy Gorvin sy’n ymuno â Timm van der Gugten yn y canol.

Ar ôl 40 pelawd, Morgannwg 178 am saith.

Fe fu sawl llanw a thrai yn ystod y dydd, ond mae’r sir Gymreig ar y droed flaen unwaith eto.

“Rooooooooooooot!”

Mae Billy Root newydd daro ergyd chwech enfawr i gyfeiriad y babell letygarwch. Tarodd y bêl y to cyn bownsio dros y top.

Morgannwg 151 am saith ym mhelawd rhif 34.

50 i ennill. Digon o belawdau i ddod, ond mae’r wicedi’n bryder.

Mae’n rhaid dechrau ystyried y posibilrwydd y gallai Morgannwg golli’r ornest hon o sefyllfa le ddylen nhw fod wedi ei hennill hi.

Maen nhw wedi colli saith wiced mewn llai na 21 pelawd, a Billy Root yw’r batiwr cydnabyddedig olaf bellach.

WICED!

Dan Douthwaite allan, wedi’i ddal gan Tom Haines yn y slip oddi ar fowlio Lenham.

Morgannwg 143 am saith, ond mae’r targed DLS bellach wedi codi i 160. Yn ffodus iawn i Forgannwg, mae’n ymddangos bod y glaw wedi cilio am y tro, er ei bod hi’n dywyll o hyd.

Timm van der Gugten sydd wrth y llain.

WICED!

Ben Kellaway wedi’i ddal gan Tom Clark yn y cyfar oddi ar fowlio’r troellwr coes Archie Lenham.

Morgannwg 141 am chwech ym mhelawd rhif 29, ac maen nhw un rhediad yn unig ar y blaen i DLS bellach.

Dan Douthwaite yw’r batiwr newydd.

Mae’n dechrau bwrw nawr, ond yn ysgafn. Gawn ni weld beth fydd yn digwydd, ond mae’r chwaraewyr am aros ar y cae am y tro.

Ar hyn o bryd, mae Morgannwg ar y blaen i DLS.