Morgannwg v Sussex: Y sir Gymreig yn ennill gêm gyffrous ar y Gnoll

WICED!

Will Smale wedi’i ddal gan Oli Carter oddi ar fowlio Jack Campbell am ddeg. 

Daeth y bêl oddi ar ymyl y bat wrth i’r batiwr chwarae ergyd amddiffynnol.

Morgannwg 65 am un wrth i Tom Bevan ddod i’r llain.

Ar ôl 10 pelawd, Morgannwg 65 heb golli wiced.

Roedd Sussex yn 41 am un ar yr un adeg yn eu batiad nhw, felly Morgannwg yn sicr ar y droed flaen nawr bod y drefn DLS yn dod i rym hefyd.

Mae’n bygwth glaw o hyd, ond mae’n weddol sych am y tro er yn dywyll iawn.

Morgannwg wedi dechrau eu batiad yn dda, 23 heb golli wiced o fewn pum pelawd.

Mae’r glaw ar ei ffordd yma yng Nghastell-nedd, a’r seddi lletygarwch awyr agored yn wag bellach.

Bydd y drefn DLS, sy’n addasu’r sgôr o ganlyniad i’r tywydd, yn dod i rym ar ôl deg pelawd. Dim ond dwy belawd sydd wedi’u bowlio hyd yn hyn.

Mae batiad Morgannwg ar fin dechrau, gyda Will Smale ac Eddie Byrom yn agor y batio. Fe gofiwch chi eu bod nhw wedi adeiladu partneriaeth o 103 yn erbyn Swydd Nottingham yma ddydd Mercher.

Mae angen 201 arnyn nhw i ennill ac i gynnal eu record ddi-guro yn y gystadleuaeth. Ond mae’r awyr yn dywyll iawn erbyn hyn, ond mae’r glaw yn cadw draw am y tro.

WICED!

Lenham wedi’i ddal gan Ingram oddi ar fowlio McIlroy am 31.

Sussex 200 i gyd allan oddi ar 47.2 pelawd.

Perfformiad arbennig gan fowlwyr Morgannwg.

201 fydd eu nod.

WICED!

Colin Ingram wedi dal Sean Hunt oddi ar fowlio Douthwaite, sydd wedi cipio’i bedwaredd wiced.

Sussex 193 am naw o fewn 46 pelawd. A fyddan nhw’n llwyddo i bara’r 50 pelawd, tybed?

Jack Campbell yw’r batiwr olaf.

WICED!

Foreman wedi’i fowlio gan Douthwaite am 32.

Roedd Foreman a Lenham newydd gyrraedd eu partneriaeth o hanner cant.

Sussex 181 am wyth ym mhelawd rhif 44.

Ar ôl 40 pelawd, Sussex 168 am saith.

Mae Bertie Foreman ac Archie Lenham wedi llwyddo i sefydlogi’r batiad rywfaint ar ôl y chwalfa. Maen nhw wedi ychwanegu 30 at y sgôr.

WICED!

Ibrahim wedi’i ddal gan Tom Bevan yn y slip. Wiced i Ben Kellaway â’i law chwith.

Sussex 130 am saith.

Archie Lenham wrth y llain – y drydedd genhedlaeth yn y teulu i gynrychioli’r sir, ar ôl ei dad Neil (1984-97) a’i dad-cu Les (1956-70).