Buddugoliaeth i Swydd Gaerloyw

Sgorfwrdd

Bydd tîm criced Morgannwg yn awyddus i daro’n ôl ar ôl crasfa gan Wlad yr Haf yn Taunton y penwythnos diwethaf, wrth iddyn nhw groesawu eu cymdogion Swydd Gaerloyw i Gaerdydd heno (nos Iau, Mehefin 20).

Bydd y ddau dîm yn cystadlu am Dlws Mon Motors ar ddiwedd yr ornest sy’n cael ei hadnabod wrth yr enw ‘Brwydr y Bont’.

Mae Swydd Gaerloyw un pwynt ac un safle uwchlaw Morgannwg yn y tabl, ac mae’r sir Gymreig wedi ennill dwy gêm a cholli tair, gydag un wedi dod i ben heb ganlyniad oherwydd y tywydd.

Daeth y buddugoliaethau yn erbyn Middlesex yn Lord’s a Sussex yng Nghaerdydd.

Ond fe gawson nhw grasfa o 108 o rediadau yn Taunton, a chael eu bowlio allan am 85.

Roedd Morgannwg yn fuddugol yn eu dwy gêm ugain pelawd, gartref ac oddi cartref, yn erbyn Swydd Gaerloyw y tymor diwethaf.

Bydd y belen gyntaf yn cael ei bowlio am 6.30yh.

‘Ceisio ymateb’

Ar ôl heno, bydd Morgannwg yn teithio i’r Oval nos fory (nos Wener, Mehefin 21) ar gyfer eu hail gêm mewn dwy noson.

Yn ôl Grant Bradburn, fu’n siarad â golwg360 yn Taunton, mae’r gemau’n gyfle i roi’r canlyniad yn erbyn Gwlad yr Haf y tu ôl iddyn nhw.

“Dyna’r peth hyfryd am griced, yn enwedig y gêm sirol – sy’n newydd i fi o ran hyfforddi yn y wlad hon,” meddai.

“Mae’r gemau’n dod yn gyflym, felly mae tueddiad i ni ymlwybro a symud o un gêm i’r llall. Rydyn ni wedi siarad dipyn am hynny.

“Rydyn ni’n dîm sydd eisiau dysgu a thyfu o bob profiad, da neu ddrwg, a byddwn ni’n sicr yn ceisio taro’n ôl.

“Byddwn ni’n myfyrio ar y pethau wnaethon ni’n dda, ac roedd digon o’r rheiny yn ein batiad cyntaf.

“A byddwn ni’n ceisio gwella a dod o hyd i fformiwla i fatio’r ffordd rydyn ni eisiau batio yn y fformat yma.

“Rydyn ni wedi ennill dwy gêm yn y gystadleuaeth ac wedi dod yn agos mewn gemau eraill, ond dydyn ni ddim wedi batio cystal ag yr oedden ni eisiau yma.

“Byddwn ni’n gweithio’n galed ac yn trafod sut i roi’r cyfan at ei gilydd yn well.

“Mae ein carfan wedi ymarfer gydag awch yr wythnos hon, wrth i ni geisio ymateb i berfformiad ddydd Sul yn Taunton doedden ni’n sicr ddim yn falch ohono.

“Rydyn ni wedi canolbwyntio ar ddod â mwy o gryfderau ein sgiliau ni i bob agwedd ar y gêm, gan bwyllo mwy.

“Rydyn ni wedi cyffroi fel grŵp o fod yn ôl yng Ngerddi Sophia gerbron teulu, ffrindiau a chefnogwyr cartref.”

Carfan Morgannwg: K Carlson (capten), E Byrom, S Northeast, C Ingram, M Labuschagne, C Cooke, D Douthwaite, T Bevan, W Smale, T van der Gugten, J McIlroy, B Kellaway, A Gorvin, H Podmore, M Crane

Carfan Swydd Gaerloyw: J Taylor, C Bancroft, J Shaw, G van Buuren, D Payne, Zaman Akhter, J Bracey, B Webster, M Taylor, Ajeet Singh Dale, B Charlesworth, O Price, M Hammond, M de Lange