Nid fi yw hwn
Er mwyn gadael sylw, mae angen mewngofnodi neu ymuno â’r safle.
Sgorfwrdd – Morgannwg v Surrey
Bydd tîm criced Morgannwg yn agor eu hymgyrch ugain pelawd yn y Vitality Blast yng Nghaerdydd heno (nos Wener, Mai 31).
Byddan nhw’n herio Surrey (6.30yh), cyn wynebu Sussex yn y brifddinas brynhawn Sul (Mehefin 2, 2.30yp).
Hon fydd gêm ugain pelawd gynta’r troellwr coes Mason Crane i’r sir, ar ôl iddo symud ar fenthyg o Hampshire.
Bydd James Harris yn cael gorffwys, ond mae’r ddau chwaraewr tramor Colin Ingram a Marnus Labuschagne wedi’u cynnwys.
Enillodd Surrey eu gêm agoriadol o bum wiced yn erbyn Hampshire yr wythnos hon, ond dydy Morgannwg na Sussex ddim wedi chwarae eto.
‘Gwefr’
“Mae gwefr yn y garfan yn sgil newid fformat a chyflymdra, gyda’r T20 wedi ein cyrraedd,” meddai Grant Bradburn, prif hyfforddwr Morgannwg.
“Dros y tri mis diwethaf, rydyn ni wedi symud ein sylw yn rheolaidd tuag at y T20 rhwng canolbwyntio ar y Bencampwriaeth.
“Mae ein carfan i gyd yn dechrau’r ymgyrch yn y Vitality Blast gydag eglurder o ran ein cynlluniau er mwyn ennill, gan gynnwys rolau unigol sydd yn gweddu orau i’r sgiliau gwych sydd gennym yn ein tîm.
“Mae tipyn o gyffro’n adeiladu, yn enwedig gyda’r ddwy rownd gyntaf o gemau gartref, lle mae gennym ni gyfle i arddangos ein sgiliau gerbron teulu, ffrindiau a chefnogwyr y tîm cartref yng Ngerddi Sophia.”
Carfan Morgannwg: K Carlson (capten), E Byrom, S Northeast, C Ingram, M Labuschagne, C Cooke, D Douthwaite, T Bevan, M Crane, T van der Gugten, J McIlroy, H Podmore, B Kellaway, W Smale, A Gorvin
Carfan Surrey: O Pope (capten), S Abbott, G Atkinson, R Burns, T Curran, J Clark, L Evans, S Johnson, D Lawrence, J Roy, D Sibley, J Smith, C Steel, D Worrall