Nid fi yw hwn
Er mwyn gadael sylw, mae angen mewngofnodi neu ymuno â’r safle.
gan
Alun Rhys Chivers
Gerddi Sophia, Caerdydd
Mae tîm criced Morgannwg yn croesawu Sussex ar gyfer gêm yn ail adran y Bencampwriaeth heddiw (dydd Gwener, Mai 10).
Dyma’r eildro i Forgannwg chwarae yng Ngerddi Sophia y tymor hwn, wrth iddyn nhw geisio’u buddugoliaeth gyntaf yn 2024.
Fe wnaeth y sir Gymreig frwydro’n galed i achub yr ornest yn erbyn Swydd Efrog yn Headingley, gan orffen yn gyfartal ar ôl bod ymhell ar ei hôl hi ar ddiwedd y batiad cyntaf.
Cipiodd Mason Crane, y troellwr coes, bum wiced mewn batiad am y tro cyntaf i’w sir newydd, wrth i Joe Root a Finlay Bean daro canred yr un i’r Saeson.
Tarodd Colin Ingram a Sam Northeast ganred yr un i Forgannwg yn yr ail fatiad.
Northeast yw prif sgoriwr y Bencampwriaeth i unrhyw sir erbyn hyn, ac mae’n anelu am 1,000 o rediadau cyn diwedd mis Mai.
Mae Sussex ar frig y tabl, tra bod Morgannwg yn chweched.
Yr wythnos ddiwethaf, fe wnaeth y prif hyfforddwr Grant Bradburn ganmol cymeriad Morgannwg, gan ddweud eu bod nhw’n awyddus i berfformio’n dda eto gerbron eu cefnogwyr eu hunain yng Nghaerdydd.
Ychwanegodd y byddai’r gêm yn erbyn Sussex yn arwydd da o le maen nhw arni y tymor hwn.
Gemau’r gorffennol
Y llynedd, tarodd Sam Northeast ganred, gan adael Sussex yn cwrso 359 i ennill oddi ar 113 o belawdau.
Brwydrodd y Saeson yn galed cyn i’r troellwr coes Mitchell Swepson ganfod cymorth yn y llain.
Ond llwyddodd Oli Carter i amddiffyn yn gadarn, gan wynebu 21.2 pelawd gyda Henry Shipley i sicrhau gêm gyfartal.
Yn 2022, roedd Morgannwg yn fuddugol o bum wiced, wrth i Eddie Byrom a Colin Ingram adeiladu partneriaeth ail wiced o 328 mewn 90 pelawd i sicrhau eu buddugoliaeth gyntaf dros Sussex yng Nghaerdydd ers 1999.
Bryd hynny, cipiodd y ddau Gymro Simon Jones a Robert Croft bum wiced yr un, cyn i Steve James daro 153 wrth i Forgannwg gwrso 336 ar y diwrnod olaf ac ennill o chwe wiced.
Carfan Morgannwg: S Northeast (capten), K Carlson, T Bevan, E Byrom, C Cooke, M Crane, A Gorvin, Mir Hamza, J Harris, C Ingram, J McIlroy, B Root, Zain ul Hassan
Carfan Sussex: J Simpson (capten), T Alsop, J Carson, O Carter, T Clark, J Coles, H Crocombe, T Haines, F Hudson-Prentice, S Hunt, A Karvelas, D Lamb, C Pujara, J Seales
Am yr ail waith yn y gêm, mae Mir Hamza wedi gadael yr ymosod ac yntau yn ei anterth. Penderfyniad rhyfedd.
Ffigurau’r ddau fowliwr ar hyn o bryd:
Andy Gorvin: 1-1-0-2
Mir Hamza: 6-1-17-3
Ail wiced yn y belawd i Andy Gorvin. Hwnnw ar dân hefyd.
John Simpson â’i goes o flaen y wiced heb sgorio.
Sussex 32 am bump ac mewn trafferthion difrifol nawr.
WICED!
Andy Gorvin yn tanio gyda’i belen gyntaf.
Pujara allan am dri, wedi’i ddal gan y wicedwr Chris Cooke.
Sussex 32 am bedair, ac mewn rhywfaint o drafferth. Ar ei hôl hi o 101.
Trydedd wiced i Mir Hamza!
Tom Alsop â’i goes o flaen y wiced am bump.
Sussex 32 am dair, ar ei hôl hi o 101 o hyd.
Wiced!
Mir Hamza wedi cael gwared ar Tom Haines, wedi’i ddal gan Andy Gorvin yn y slip am 14.
Sussex 29 am ddwy, ar ei hôl hi o 104.
Dechrau da i Forgannwg.
Wiced i Mir Hamza. Tom Clark â’i goes o flaen y wiced am wyth.
Sussex 22 am un. Ar ei hôl hi o 111.
Batiad Morgannwg wedi dod i ben ar 411.
Mir Hamza wedi’i redeg allan.
Bydd Morgannwg yn dechrau’r trydydd diwrnod ar 411 am naw. Maen nhw ar y blaen o 133 o rediadau.
Mir Hamza a Zain ul Hassan fydd wrth y llain.
Diwrnod mawr i ddod wrth i Forgannwg geisio buddugoliaeth gynta’r tymor.
Morgannwg yn gorffen y diwrnod ar 411 am naw.