Mae Virginia Crosbie, aelod seneddol Ceidwadol Ynys Môn, yn cael ei hannog i warchod dioddefwyr trais yn y cartref wrth i’r sefyllfa waethygu yn sgil cyfyngiadau’r coronafeirws.
Mae pôl newydd yn dangos bod 76% o bobol yng Nghymru yn credu y dylai gwleidyddion wneud mwy i warchod pobol mewn perygl.
Ar hyn o bryd, does dim modd i fenywod sydd heb statws mewnfudo diogel gael mynediad i lochesi ar gyfer menywod bregus a chefnogaeth allweddol arall.
Mae Virginia Crosbie yn aelod o bwyllgor trais yn y cartref yn San Steffan, ac maen nhw’n craffu ar fesur seneddol y mis yma.
Mae ymgyrchwyr yn annog y pwyllgor i gynnig gwarchodaeth gyfartal i ddioddefwyr trais yn y cartref, sy’n aml yn methu cael mynediad i wasanaethau.
Pôl
Yn ôl pôl gan Opinium ar ran Amnest Ryngwladol, mae 76% o bobol yng Nghymru yn credu y dylai’r llywodraeth wneud mwy i fynd i’r afael â’r sefyllfa.
Mae 74% yn cytuno bod angen gwneud mwy i warchod y bobol fwyaf bregus, waeth bynnag am eu statws mewnfudo.
Mae 62% yn credu y dylai’r llywodraeth gynnig mwy o arian i warchod gwasanaethau arbenigol, ac 86% yn credu y dylid trin pob dioddefwr yn gyfartal.
Cafodd 2,000 o oedolion eu holi rhwng Ebrill 24-27.
