Dylai pobol ifanc yng Nghymru aros mewn addysg neu hyfforddiant nes eu bod yn troi’n 18 oed, yn ôl adroddiad gan y Sefydliad Ymchwil Polisi Cyhoeddus.
Mae’r felin drafod yn awgrymu na ddylai pobol ifanc adael yr ysgol wedi iddyn nhw droi’n 16 oed.
Yn ôl y ffigyrau diweddaraf mae oddeutu 10.3% o bobl ifanc 16-18 oed un ai yn ddi-waith, neu ddim mewn addysg neu hyfforddiant.
Y gred yw y byddai hyn yn rhwystro pobol ifanc rhag derbyn cyflogau llai mewn swyddi dros dro ar ôl gadael yr ysgol.
“Uchelgais”
Dywed yr adroddiad: “Mae’n ymddangos bod Llywodraeth Cymru yn ymwybodol o ba mor bwysig y gallai’r system sgiliau fod dros y blynyddoedd i ddod, gan ddatblygu nifer o strategaethau sy’n ymwneud â sgiliau yn ystod y blynyddoedd diwethaf.
“Hyd yn hyn, fodd bynnag, nid yw uchelgais y llywodraeth â diwygiadau bob amser wedi cyfateb â maint yr her.”
Prentisiaethau
Ond dywed Llywodraeth Cymru eu bod wedi creu 74,000 o brentisiaethau ers 2016, cyn honni bod y mwyafrif o bobol ifanc yn parhau mewn addysg neu hyfforddiant wedi iddynt droi’n 16.
Ar hyn o bryd, mae pobol ifanc yn cael gadael yr ysgol ar ôl iddynt gwblhau eu TGAU heb orfod cwblhau addysg bellach na dilyn cwrs hyfforddi.
Dywed llefarydd ar ran Llywodraeth Cymru: “Mae dros 90% o ddisgyblion yng Nghymru’n aros mewn addysg llawn amser neu hyfforddiant ar ôl troi’n 16 oed.
“Mae gennym nifer o bolisïau i helpu pobol ifanc i gael gwaith neu addysg, gan gynnwys ein buddsoddiad mewn prentisiaethau.”
