Mae gwleidyddion Dwyfor Meirionnydd wedi croesawu’r newyddion fod Cyngor ar Bopeth Gwynedd wedi derbyn cyllid newydd i helpu i ateb y galw cynyddol am wasanaethau o ganlyniad i’r argyfwng costau byw.
Bydd yr arian gan Gronfa Gymunedol y Loteri Genedlaethol yn cyfrannu at recriwtio aelod o staff a fydd yn galluogi swyddfa Cyngor ar Bopeth yn Nolgellau i gynyddu’r ddarpariaeth o wasanaethau a recriwtio mwy o wirfoddolwyr.
Fe wnaeth Liz Saville Roberts, yr Aelod Seneddol, a Mabon ap Gwynfor, yr Aelod o’r Senedd, gyfarfod â Tal Michael, Prif Weithredwr Cyngor ar Bopeth Gwynedd, a gwirfoddolwyr yn swyddfa Dolgellau’n ddiweddar i drafod yr heriau sy’n wynebu’r gwasanaeth.
“Roeddem yn falch o glywed bod Cyngor ar Bopeth Gwynedd wedi derbyn cyllid gan Gronfa Gymunedol y Loteri Genedlaethol a fydd yn cael ei ddefnyddio i recriwtio aelod o staff i gefnogi eu gwaith a helpu i gwrdd â’r galw cynyddol am wasanaethau,” meddai’r ddau.
“Mae staff a gwirfoddolwyr CAB yn gwneud gwahaniaeth enfawr i fywydau pobol.
“Mae eu hymroddiad i ddarparu cyngor cyson a dibynadwy i’r rhai sy’n mynd trwy gyfnod anodd yn wirioneddol werthfawr ac maent yn haeddu cydnabyddiaeth am eu gwasanaeth.
“Mae cartrefi a busnesau yn Nwyfor Meirionnydd yn cael eu taro’n wael gan yr argyfwng gostau byw a’r argyfwng ynni, a gwyddom o’n gwaith achos pa mor bryderus yw pobol am eu sefyllfa ariannol.
“Mae’r sefyllfa’n mynd yn annioddefol i lawer – gyda chartrefi incwm is yn dioddef fwyaf.
“Mae tîm CAB yn Nolgellau, ac yn wir ar draws Gwynedd, yn darparu rhwyd ddiogelwch hanfodol i’r rhai sydd wedi cael eu methu fwyaf gan y llywodraeth Dorïaidd hon.
“Byddem yn annog unrhyw un sydd angen cyngor i gysylltu â’u swyddfa CAB leol.”
