Mae Eglwys Gadeiriol Bangor wedi cael ei hagor fel canolfan frechu ers ddoe (dydd Llun, Gorffennaf 5), a hynny ar ôl i ganolfan frechu torfol Ysbyty Enfys gau ei drysau.
Roedd y ganolfan honno wedi ei lleoli yng nghyfleuster chwaraeon Prifysgol Bangor, Canolfan Brailsford, ers mis Ebrill y llynedd.
Bydd y safle hwnnw wedi ei gau yn llwyr erbyn mis Medi eleni, ac yn gweithredu fel canolfan chwaraeon unwaith eto.
Ers mis Rhagfyr y llynedd, fe fu Ysbyty Enfys yn cael ei ddefnyddio fel canolfan frechu torfol, a llwyddodd y ganolfan i roi 85,000 o frechlynnau.
‘Croeso i bawb’
“Dros y misoedd nesaf, bydd Cadeirlan Sant Deiniol yn cael ei ddefnyddio fel canolfan frechu NHS,” meddai Andy John, Esgob Bangor, mewn fideo gan yr Esgobaeth i groesawu’r ganolfan newydd.
“Bydd miloedd o bobl yn dod yma i chwarae eu rhan yn cadw pawb yn saff.
“Dyma lle gwnaeth Deiniol, bron i 1500 mlynedd yn ôl, sefydlu ei gymuned fynachaidd – y Bangor wreiddiol, ac mae ein cadeirlan wedi bod yn le i weddi, prydferthwch a sancteiddrwydd i’r holl gymuned ers tro.
“Mae’n rhaid i ni gael ein hunain wedi brechu a bydd croeso i bawb o’r gymuned drwy’r drysau hyn dros y misoedd nesaf.
“Mae Cadeirlan Sant Deiniol yma i ni gyd.”
Wrth fy modd i gyhoeddi bydd y Cadeirlan yma ym Mangor yn gweithredu fel canolfan brechu. Fraint i gydweithio gyda'r NHS.@NHS @EsgobaethBangor @ChurchinWales pic.twitter.com/pMoEysTYgO
— Bishop of Bangor (@BishopBangor) June 30, 2021