Canolfan Soar ym Merthyr
Roedd Canolfan Soar ym Merthyr Tudful werth £1.3 miliwn i economi De Cymru yn 2014, yn ôl amcangyfrifon.
Canolfan Gymraeg a theatr gymunedol Merthyr Tudful yw Canolfan Soar.
Caiff yr amcangyfrif ei wneud mewn adroddiad sydd wedi’i gyhoeddi gan Ymchwil Arad ac a gafodd ei gomisiynu gan Fenter Iaith Merthyr Tudful.
Er mwyn llunio’r adroddiad ‘Gwerthusiad o draweffaith economaidd a diwylliannol Canolfan Soar, Merthyr Tudful’, cwblhaodd Arad ymchwil yn seiliedig ar wybodaeth a gafodd ei chasglu gan Ganolfan Soar.
Roedd y data’n cynnwys niferoedd cynulleidfa, gwariant ar nwyddau, gwasanaethau a staff, buddsoddiad pellach a chyllid.
Cyfraniad at yr economi
Mae’r draweffaith economaidd flynyddol yn ystyried gwariant uniongyrchol, anuniongyrchol a chamau pellach a gafodd eu hysgogi gan weithgareddau’r Ganolfan.
Er mwyn cwblhau’r ymchwil, cafodd cyfweliadau eu cynnal gyda rhanddeiliaid strategol, staff y ganolfan a grwpiau cymunedol lleol.
Cyfrannodd y Ganolfan £594,100 i £608, 537 i’r economi leol yn 2014 ac yn ôl amcangyfrifon, cyfanswm y draweffaith economaidd yw £1.29-1.30 miliwn.
Mae grantiau gwerth £173,000 y ganolfan wedi arwain at draweffaith crynswth o £323,310 i £331,170 i Ferthyr Tudful, a £707,470 i £709,810 i dde Cymru.
Sefydliad pwysig
Mae’r Ganolfan yn darparu lleoliad i bobl gwrdd, dysgu, cymdeithasu ac ymgysylltu ag addysg a’r celfyddydau. Gellir gweld y Ganolfan felly fel sefydliad pwysig sydd yn denu pobol yn ôl at ganol y dref.
Mae’r pwyslais cryf ar etifeddiaeth ieithyddol a diwylliannol Merthyr Tudful wedi bod yn elfen hanfodol o draweffaith y Ganolfan.
Mae Canolfan Soar wedi gwneud cyfraniad pwysig tuag at newid canfyddiadau o Ferthyr Tudful fel lle ar gyfer digwyddiadau diwylliannol ac i ehangu mynediad i’r celfyddydau.
Caiff yr adroddiad ei gyflwyno i Brif Weinidog Cymru, Carwyn Jones heddiw mewn
cyfarfod i drafod traweffaith gwaith y Mentrau Iaith drwy Gymru gyfan.
‘Adfywio cymunedau’
Dywedodd Prif Swyddog Menter Iaith Merthyr Tudful, Lisbeth McLean: “Rydyn ni mor falch o’r cyfraniad mae Canolfan Soar yn wneud yn ein cymuned.
“Mae’r astudiaeth yma yn fesuriad o draweffaith economaidd a diwylliannol gall cael ei ddefnyddio i ddangos gwerth am arian er mwyn denu mwy o arian i ddatblygu’r Gymraeg.
“Rydym nawr yn gallu profi bod yr iaith Gymraeg yn adfywio cymunedau ac yn werth buddsoddi ynddi.”