Y Torïaid yn cipio chwe sedd oddi ar Lafur yng Nghymru

Mae’r Ceidwadwyr wedi cipio chwe sedd oddi ar y Blaid Lafur ar noson sydd wedi newid y tirlun gwleidyddol yng Nghymru – gyda’r Democratiaid Rhyddfrydol wedi diflannu’n llwyr.

Yn y sioc fwyaf ohonyn nhw i gyd, mae Llafur wedi colli sedd Ynys Môn, wrth i Virginia Crosbie o Essex gipio’r sedd oddi ar Lafur yn dilyn ymddeoliad Albert Owen.

Sicrhaodd hi fwyafrif o 1,968 dros yr ymgeisydd Llafur, Mary Roberts.

Ar noson pan fo nifer o seddi coch wedi troi’n las ar draws y gogledd, mae Llafur hefyd wedi colli Wrecsam, Dyffryn Clwyd, De Clwyd a Delyn.

Maen nhw hefyd wedi cipio Pen-y-bont oddi ar Lafur gan greu sioc bellach yn y de.

Yn dilyn cyfnod cythryblus i’r Ceidwadwyr yn etholaeth Brycheiniog a Maesyfed, maen nhw wedi adennill y sedd oddi ar y Democratiaid Rhyddfrydol, oedd wedi ennill is-etholiad yn gynharach eleni diolch i Jane Dodds, yn dilyn y penderfyniad i symud Chris Davies o’i sedd.

Erbyn hyn, mae gan Lafur 22 sedd, a’r Ceidwadwyr yn codi i 14.

Er mai cael a chael oedd hi i Ben Lake a Jonathan Edwards, llwyddodd Plaid Cymru i ddal eu gafael ar Geredigion a Dwyrain Caerfyrddin a Dinefwr, yn ogystal ag Arfon a Dwyfor-Meirionnydd.

Does gan y Democratiaid Rhyddfrydol ddim un sedd erbyn hyn.

Blog byw etholiad 2019

Newyddion, sylwadau a chanlyniadau drwy gydol y nos

Y canlyniadau’n llawn