Cyhoeddi enw dynes fu farw mewn gwrthdrawiad yng Nghaerdydd

Mae Heddlu’r De wedi cyhoeddi enw dynes fu farw mewn gwrthdrawiad yng Nghaerdydd ddydd Sadwrn (Tachwedd 28).

Bu farw Danielle Andrews, 28 oed o ardal Rhiwbeina y brifddinas, yn y gwrthdrawiad ger cylchfan Coryton.

Dywed y teulu ei bod hi’n ferch, wyres a nith.

“Roedd gan Danielle gysylltiadau â’r Cymoedd ac ardal Caerdydd a bydd colled ar ei hôl ymhlith ei ffrindiau niferus.

“Roedd ganddi synnwyr digrifwch da a byddai hi’n gwneud ffrindiau’n hawdd.

“Mae hi wedi cael ei chymryd yn rhy fuan o lawer o’n bywydau ac rydym yn torri’n calonnau oherwydd ei marwolaeth, ac yn gobeithio ei bod hi wedi darganfod heddwch nawr.”

Mae ymchwiliad yr heddlu’n parhau, a dylai unrhyw un â gwybodaeth eu ffonio ar 101.

Coronafeirws: 23 o farwolaethau, 667 o achosion yng Nghymru heddiw (dydd Mawrth, Rhagfyr 1)

Mae Iechyd Cyhoeddus Cymru wedi cyhoeddi 23 yn rhagor o farwolaethau yn eu ffigurau coronafeirws dyddiol heddiw (dydd Mawrth, Rhagfyr 1).

Mae’n mynd â’r cyfanswm ers dechrau’r ymlediad yn y wlad i 2,563.

Maen nhw hefyd wedi cyhoeddi 667 o achosion newydd, sy’n mynd â’r cyfanswm hwnnw i 81,009.

Ond dydy’r ffigurau ddim yn debygol o fod yn fanwl gywir yn sgil y ffordd y caiff achosion a marwolaethau eu cofnodi a’u hadrodd.