Bydd Stephen Jones yn cymryd lle James Hook ar y fainc ar gyfer y gêm yfory yn erbyn Lloegr, wrth i Gymru geisio cipio’r Goron Driphlyg.
Bu Hook yn sâl yn ddiweddar gyda’r Frech Ieir, ac nid yw’n ddigon iach i gymryd ei le ar y fainc yn eilydd i’r maswr rhif un Rhys Priestland.
Stephen Jones sy’n dal y record ar gyfer y nifer uchaf o ymddangosiadau rhyngwladol dros Gymru, sef 104.
Gwnaeth ei ymddangosiad rhyngwladol cyntaf fel eilydd yn erbyn De Affrica yn 1998, ac mi chwaraeodd ran allweddol yn y ddwy Gamp Lawn yn 2005 a 2008.
