Does dim un Cymro yng ngharfan Tân Cymreig, y tîm criced dinesig a fydd yn cynrychioli Caerdydd yng nghystadleuaeth can pelen The Hundred y tymor nesaf.
Cafodd yr wyth carfan eu dewis heno, gyda’r timau’n cynrychioli Caerdydd, Manceinion, Llundain (dau dîm), Nottingham, Southampton, Leeds a Birmingham.
Yr unig chwaraewr o Forgannwg yn y garfan yw’r capten undydd Colin Ingram o Dde Affrica, a gafodd ei ddewis ymlaen llaw.
Mae dau o chwaraewyr Morgannwg wedi’u dewis i dimau eraill, sef Chris Cooke (Birmingham) a Marchant de Lange (Manceinion) – y ddau yn enedigol o Dde Affrica.
Yr unig Gymro o ran genedigaeth yn y gystadleuaeth yw Phil Salt, a gafodd ei eni ym Modelwyddan ac sydd wedi’i ddewis gan Fanceinion.
Sut oedd y broses yn gweithio?
Roedd saith rownd i gyd, gyda phob tîm yn cael dewis dau chwaraewr ym mhob rownd.
Tân Cymreig oedd y pedwerydd tîm i ddewis yn y rownd gyntaf, a’r drefn yn mynd am yn ôl fesul rownd.
Roedd y chwaraewyr yn costio symiau gwahanol ym mhob rownd – £125,000 yn y rownd gyntaf, £100,000 yn yr ail, £75,000 yn y drydedd, £60,000 yn y bedwaredd, £50,000 yn y bumed, £40,000 yn y chweched a £30,000 yn y seithfed.
Roedd gan bob tîm yr hawl i ddewis uchafswm o dri chwaraewr tramor, ac roedden nhw eisoes wedi dewis dau chwaraewr lleol ac un chwaraewr rhyngwladol â chytundeb canolog gan Loegr cyn y broses heno.
Jonny Bairstow, Colin Ingram a Tom Banton oedd dewisiadau cyntaf Tân Cymreig, gyda Colin Ingram a Tom Banton yn llenwi’r blychau £100,000.
Roedd gan bob tîm 100 eiliad i ddewis pob chwaraewr yn eu tro.
Gall y chwaraewyr hynny oedd wedi cofrestru ond heb gael eu dewis gael eu tynnu i mewn fel eilydd yn ystod y gystadleuaeth, ond rhaid bod y tîm hwnnw wedi cynnig y pris llawn am y chwaraewr.
Bydd pob tîm yn cael dewis un chwaraewr olaf ar ddiwedd cystadleuaeth ugain pelawd sirol y Vitality Blast y tymor nesaf.
Y gystadleuaeth
Bydd y gystadleuaeth yn cael ei chynnal rhwng Gorffennaf 17 ac Awst 16 y flwyddyn nesaf.
Bydd 32 gêm i gyd, gyda phob tîm yn herio’i gilydd unwaith, ac eithrio’r timau sydd wedi’u paru, a fydd yn chwarae yn erbyn ei gilydd ddwywaith – bydd Tân Cymreig yn herio Southern Brave.
Bydd y tîm ar frig y tabl yn mynd i’r ffeinal, a’r ail a’r trydydd timau’n herio’i gilydd am yr ail le yn y gêm derfynol.
Bydd y BBC yn darlledu 10 gêm y dynion ac wyth gêm y menywod.
Y garfan
Chwaraewr rhyngwladol Lloegr – Jonny Bairstow
£125,000 – Steve Smith, Mitchell Starc
£100,000 – Colin Ingram, Tom Banton
£75,000 – Ravi Rampaul, Ben Duckett
£60,000 – Simon Harmer, Qais Ahmed
£50,000 – Liam Plunkett, Ryan ten Doeschate
£40,000 – David Payne, Ryan Higgins
£30,000 – Danny Briggs, Leus du Plooy