Mae heddluoedd Cymru yn parhau i rybuddio gyrwyr i gymryd gofal ar y ffyrdd wrth i broffwydi’r tywydd ddweud y bydd mwy o eira’n disgyn heno.
Dywedodd Heddlu Dyfed Powys y dylai gyrwyr gymryd gofal a paratoi ymlaen llaw cyn teithio heddiw yn dilyn “eira sylweddol” ar draws y canolbarth.
Maen nhw’n dweud bod awdurdodau’n ymdrechu i gadw’r prif ffyrdd ar agor.
Er hynny, mae trafferthion ar lawer o ffyrdd, yn enwedig yn Sir Gaerfyrddin a Cheredigion, lle mae’r cyngor sir wedi apelio ar i yrwyr aros gartre.
Yr unig gysur yw nad yw hi’n rhewi yn yr ardaloedd rheini ar hyn o bryd, meddai’r heddlu.
Y Gogledd
Mae Heddlu Gogledd Cymru wedi dweud bod eu prif ffyrdd hwythau yn parhau ar agor.
Mae disgwyl y bydd yna oedi mawr ar yr A470 i gyfeiriad y gogledd rhwng Abercynon a Pentrebach oherwydd damwain.
Dywedodd llefarydd ar ran yr heddlu y dylai gyrrwyr gynllunio ymlaen a gweld beth yw’r amodau cyn dechrau ar unrhyw daith.
Ffyrdd ar gau
Yn ol Traffig Cymru mae’r ffyrdd canlynol ar gau ar hyn o bryd-
A470 Bwlch yr Oerddrws
A470 Abercynon i Bentrebach ( i gyfeiriad y gogledd)
A465 Hirwaun i Gefn Coed
A55 Cyffordd 11 Llandygai
Amodau gyrru gwael
Mae Traffig Cymru yn rhybuddio bod amodau gyrru gwael ar y ffyrdd canlynol-
M4 rhwng cyffyrdd 26 Malpas a 49 Phont Abraham
A48 rhwng Pont Abraham a Cross Hands
A465 Merthyr i’r Fenni
A470 rhwng Coryton ac Abercynon
