Mae Cadeirydd Cymdeithas Cyfeillion Radio Ceredigion wedi ymateb y prynhawn yma i’r newyddion fod gorsaf Radio Ceredigion wedi ei gwerthu.
“Mae’n dristwch mawr i mi fel Cadeirydd Cymdeithas Cyfeillion Radio Ceredigion i glywed bod yr orsaf wedi eu gwerthu i gwmni Town and Country Broadcasting,” meddai Geraint Davies mewn llythyr at Golwg 360.
“Rwy’n tristhau ymhellach wrth glywed bod y brif stiwdio a’r pencadlys yn Aberystwyth yn cau ac y bydd nifer o’r staff yn colli eu swyddi.
“Mae’n siomedig i glywed taw Arberth yn Sir Benfro fydd cartref newydd yr Orsaf.
Pryder tros raglenni newydd
“Mae Radio Ceredigion wedi bod yn gwmni mawr i filoedd o bobol Ceredigion a thu hwnt ers yn agos i ddeunaw mlynedd,” meddai Geraint Davies. “Ond, yn anffodus, rwy’n rhagweld y bydd y rhaglenni hynny sydd wedi plesio cymaint yn diflannu.
“Cryfderau mwyaf Radio Ceredigion yw’r elfen gymunedol a’r ddarpariaeth cyfrwng Cymraeg.
“Oherwydd y bygythiad i hyn, rwyf am gysylltu ar frys gyda’r perchnogion newydd er mwyn trefnu cyfarfod i drafod ei cynlluniau ac i geisio sicrhau bydd yr orsaf yn parhau i ddarparu gwasanaeth amrywiol dwyieithog o’r safon uchaf.”
Cyflwynydd a gwirfoddolwr
Fe fu Geraint Davies yn Gadeirydd Bwrdd Radio Ceredigion rhwng 1996 a 2002.
Mae’n un o wirfoddolwyr yr orsaf ac yn gyflwynydd y rhaglen chwaraeon ‘O’r Maes’ ar brynhawn Sadwrn ers 1992.
